Tripura Bru Relief Camp atanga Lunglei District-a Bru hruai kir Repatriation team thawh thumna te chuan nimin khan Lunglei District tluang taka rawn thlengin nizan dar 10:30 pm khan an riahna hmun tur 2nd Bn MAP Hqrs, Luangmual an rawn thleng. Bru repatriation thawh thumnaa Lunglei District Bru rawn let te hi chhungkaw 20 niin an zavaiin mi 81 (Adult – 51, Minor - 30) an ni.

2nd Bn MAP Hqrs, Luangmual ah hian Lunglei DC Pi K. Lalrinzuali, 2nd Bn CO Pu Saidingliana leh official engemawzatin lo hmuakin inkhawmna hun tawi neih a ni. 

He hunah hian Lunglei DC Pi K. Larinzuali chuan thu sawiin Bru repatriation chu sawrkarin a ngaih pawimawh takzet thu leh an chawlh lawkna (temporary shelter) leh an in sakna tur hmun House Plan Site te pawh mumal taka ruahman a nih thu a tarlang. An chawlh lawkna (temporary shelter) ah hun rei tak an awm theih dawn loh avangin in sa tura hma la nghal turin Bru chhungkuate hi a chah nghal a ni. An khaw pana an kal zelnaah Police ten an ven chhunzawm zel tur thu leh hriselna lama harsatna nei te tan H&FW Department atanga duty an awm tur thu a tarlang bawk. Lunglei DC chuan Bru Repatriation-a mawhphurna hrang hrang nei te tawhrimna leh inpekna avangin Repatriation hlawhtling taka kalpui a ni chu lawmawm a tih thu sawiin an chungah lawmthu a sawi bawk a ni.

Bru chhungkua te hi sawrkarin in sa tura hma la thuai tura a duh avangin nimin khan chhungkaw tin hnenah in sa tura hmalak tanna tur Rs.25,000/- theuh leh an mamawh leina tur Rs.5000/- theuh pek an ni a. Tukin khan 2nd Bn MAP Hqrs, Luangmual ah zing tuk thuan ei pui an nih hnuah 8:00 am vel atangin anmahni khua theuh panin chhuah pui leh an ni. Chhungkaw 20 te hi khaw pali - Dinthar, Putlungasih, Buknuam  leh Chawilung ‘S’ pan pui leh an ni. 

9th Batch Bru Repatriation ah hian Lunglei District ah Bru chhungkaw 364 an zavaiin mi 2051 hruaikir tur niin heng chhungkaw 364 te hi Lunglei District huam chhunga khaw pali- Putlungasih – chhungkaw 121, Chawilung S – chhungkaw 43, Dinthar – chhungkaw 187, leh Buknuam – chhungkaw 13 ah hruai kir tur an ni. Tun dinhmunah Lunglei District ah Bru chhungkaw 68 an zavaiin mi 262 hruai kir tawh an ni.