2287/2025-2026

Aizawl, 19th November, 2025 : Tukin khan Minister Pu C Lalsawivunga, bialtu MLA ni bawk chuan a bial chhung Republic Venga Kawipui junction siam that dan tur a hmunah enin, Engineer te leh khawtlang hruaituten an tawiawm.

Bialtu MLA, Minister ni bawk Pu Sawivunga chuan he junction hi kawng lun tak, mihring leh lirthei vei vak tamna, veng mipuite mai bakah zirna in hrang hrang pawhtu kawng pawimawh a ni a, lirthei bakah ke a kalte himna tur leh traffic tawt lutuk tihziaawm nan siam that hi a pawimawh takzet tih a hriat vangin a ngai pawimawh em em a, bialtu MLA a nih angin a hmunah ngei a tlawh a ni a ti a. Ruahmanna kal mek chu rang taka thawh a nih theih nan khawtlang hruaitute baka a kaihhnawih PHE, P&E, PWD, UD&PA, Traffic leh BSNL te nen a hmunah hian hmalak dan tur an sawiho nghal a ni.

Minister Pu C Lalsawivunga chuan Kawipui junction siamthatna tur sum chu UD&PA ah a awm tawh a, kutthlak thei dinhmunah kan ding tawh, a ti a. Hna tan hmain a kaihhnawih Department ten tih tur tam tak an neih avangin a hmun ngeiah sawiho a ngai a, vawiin atang chuan anmahni chanpual theuh bawhzuia, hma la nghal char char turin Minister chuan a chah a ni.

Pu C Lalsawivunga chuan Department te thawhrimnaah lawmthu sawiin, junction siam zawh a nih hma chu theihtawpa tang turin a chah a. Hma lakna a kal chho zel a, a hmawr kan bawk dawn tan a, Krismas hmain thawh zawh hman ngei kan tum tur a ni, a ti.

He kawngpui siamthatna tur hi UD&PA hnuaiah state fund atangin sum ruahman a ni a. PWD engineer te pawhin a hmun an survey fel tawh a. December thla tirah hna thawh hman an tum a ni. Hei bakah hian Venghlui Pi Pangi peng atanga chhuk thlain, Pu C Lalsawivunga bial chhunga kawngpui hrang hrang cheithat tum a nih thu vawiin hian sawilan a ni bawk.

Junction an tlawh zawh hnu hian Minister Pu C Lalsawivunga leh amah tawiawmtute hian Republic YMA Hall ah meeting an neih chhunzawm nghal a. PHE, P&E, PWD, AMC, UD&PA, Traffic leh BSNL hotute bakah, khawtlang hruaitute, tlawmngai pawl hruaitute an tel a ni.