2288/2025-2026

19th November, 2025 : November ni 6 atanga  ni 8, 2025 chhung khan Malaysia khawpui Kuala Lumpur ah  "Global Leaders Award Conclave and Summit 2025" neih a ni a. He Global Leaders  Award conclave programme ah hian khawvel hmun hrang hrang atangin award dawngtu turte an fuan khawm a. Mizoram Rajya Sabha MP Pu K.Vanlalvena chu Chief Guest a nih bakah Award dawng tura thlan zingah a tel a. A award dawn chu "North East India, Myanmar, Bangladesh a tribal ten kum 2021-2023 chhunga harsatna an tawh chungchangah anmahni thlavang hauhna kawnga hnathawh that lawmman leh chawimawina" tih a ni.

He Global Leaders Award Conclave and Summit kum tin khawvel ram hrang hrangah neih thin niin kumin hi vawi 7 an neihna a ni. Global Leaders Award Conclave and Summit 2025 hi Berjaya Time Square Hotel conference hall ah neih niin, Bizox Media Network buatsaih a ni a.  Saami Tradestar Logistic Ltd ten an sponsor thung a ni. Khawvel hmun hrang hranga media ten he programme hi an hman pui bawk a ni.