No.7124/2020-2021

Vawiin khan Agriculture, I&WR leh Cooperation Department-te changtu Minister leh Lunglei West bialtu MLA ni bawk Pu C.Lalrinsanga chuan Convention Centre, Lungleiah Lunglei District-a Department tin Head of Office-te ko khawmin Interactive Meeting a neihpui. He hunah hian Lunglei HPC Vice Chairman Pu Lawmawma Tochhawng, Lunglei South bialtu MLA Dr K.Pachhunga, party hruaitute leh Lunglei District Head of Office-te an tel a ni.

Pu C.Lalrinsanga chuan  mahni Department chan theuh fimkhur leh taima taka enkawltu Head of Office-te chungah lawmthu sawiin Department hrang hrang ten thawhhona tha tak nen hma an la tlang thin chu lawmawm a tih thu a sawi a. Department zawng zawng huap Interactive Meeting chu Department hmalaknate leh harsatna neihte langtlang taka an inhriat tawn sak theihna tur leh Department-ten thawhhona leh tanrualna tha zawk an neih theihna tura koh anih thu a sawi a. Head of Office kalkhawmte chu District ti hmasawn tura mawhphurhna fawng vuantute an nih angin an hma zawn theuha tih tur awmte uluk leh taima taka thawk chhunzawm zel tur leh mipui hamthatna dah hmasa zel turin a chah a. Head of Office-te chu an harsatna tawh te inthlahrung lova hotute hnena thlen vat thin turin a sawm bawk.

Lunglei HPC Vice Chairman Pu Lawmawma Tochhawng chuan Head of Office-te chu an hnuaia staff thawkte leh mipuite tana entawntlak tura taima taka hnathawk tura chahin Lunglei District an awm chhungin hriatreng tlak hnathawhna tha pakhat tal hnutchhiah tum turin a chah a. Department hrang hrang hnuaiah hmasawnna hnathawhte kalpui chhoh zel tum anih thu sawiin kalkhawmte chu sawrkar flagship program SEDP lo zirchiang tur leh thurawn te pe turin a sawm a ni.

Lunglei South bialtu MLA Dr K.Pachhunga pawhin thu sawiin District ti hmasawn zel tur leh mipuite himna tura dan leh thupek tha taka kenkawh zel anih theihnan Department-ten thawhhona tha tak an neih chhunzawm zel a tul a ni, a ti a. Department-ten District chhunga an hmalakna te an in hriat sak tawn a pawimawh thu sawiin hei hian hna in kal thuah leh duplicacy lo awm palh thei te a veng dawn a ni, a ti bawk.

Interactive meeting hi Lunglei DC Pu V.Lalsangliana’n kaihruaiin hlawhtling taka hman ani a.  Zawhna leh chhanna hun hman a nih bakah Lungleia Sawrkar Department hotute hian an mamawh hrang hrang bakah an hmalakna leh an hmachhawpte an sawi bawk a ni.