3424/2023-2024

Aizawl, the 22nd January, 2024: Pu F. Rodingliana, Minister of State for Power & Electricity Department, Commerce and Industries Department leh Printing & Stationery Department chuan January ni 20, 2024 (Inrinni) khan Pu Andrew Fleming, British Deputy High Commissioner for Eastern India chu a chenna in Kolkata-ah hmuin, Mizoram Chief Minister Pu Lalduhoma leh British Deputy High Commissioner-te'n January ni 6, 2024 a inbiakna an lo neih tawh bawhzuiin inkawmna hun tha tak an hmang.

Power & Electricity Minister Pu F. Rodingliana chuan British Deputy High Commissioner hnenah hian Mizoramin kawlphetha MW 4000 lai tharchhuak thei tura theihna a neih thu leh tuna tharchhuah chu beitham tak a nih thu a hrilh a. Sawrkar tharin kawlphetha-a Mizoram intodelh mai bakah hralh chhuaktu ni thei tura tanlak a tum thu sawiin, hmalakna kawngah British Deputy High Commissioner chu theihtawp chhuahpui tura sawmin foreign funding leh foreign investor-te zawnpui turin a ngen a ni.

Pu Andrew Fleming, British Deputy High Commissioner for Eastern India chuan Mizoram chanchinte a lo hriat nual tawh thu sawiin, Power Sector-a investment ti tur foreign company-te a lo zawnpui ngei tur thu Minister hi a lo hrilh a, UK a tuipui ral (overseas) lama investment khawihtu UK Export Finance pawh a lo dawr tur thu hrilhin, Mizoram tan project engtenge awm thei tih a lo enfiah tur thu a sawi bawk.

Heng bakah hia Pu Andrew Fleming chuan British Army-a Mizo thalai tam zawkte an luh theih dan turte a lo enchian tur thu sawiin, Commonwealth ramte tan ngaihnathiamna thar British sawrkarin a siam thu sawiin, chungte chu chhawr tangkai dan dap tlan a nih tur thu Minister hi a lo hrilh a. Mizoramin Agriculture Technology (Agritech) lama hmasawn a la ngaih nasat zia a lo hriat thu sawiin, hmalakpui a inhuam thu a sawi bawk a. Minister Pu F. Rodingliana chuan British High Commissioner for Eastern India chu Mizo thlalai, zirlai leh hnathawk tura UK pan tumte'n awlsam zawka VISA an neih theih nana hmalakpui turin a ngen nghal bawk a ni.

British Deputy High Commissioner for Eastern India chuan Pu F. Rodingliana'n Mizorama zin tura a sawmna leh Chief Minister pawhin Mizoram tlawh tura a lo sawm tawhnate chu tipuitling turin kumin Chapchar Kut hmang tura lo zin a chak thu a sawi bawk.

He inkawmna hunah hian Pi Madhumita Pyne, Senior Trade Advisor - Sports, Creative & Retail and Energy, British Deputy High Commission pawh a tel a. Minister Pu F. Rodingliana hi Pi Lalhmingliani Hmar, Secretary P&E Department leh Pu C. Lalropianga, Chief Engineer (Civil) te'n an tawiawm a ni.

Pu F. Rodingliana chuan January ni 19, 2024 (Zirtawpni) khan New Delhi Mizoram House-ah Government of India hnuaia PSU lian Water and Power Consultancy Services (India) Limited (WAPCOS) hotute pawh hmuin Tlawng leh Tuichang Hydel Project 24 Megawatt ve ve pe chhuak thei tur DPR siam tur chungchang pawh a sawifel pui nghal a. Hemi hnu hian World Bank hotute nen pawh inbiain, World Bank hotute hian tun dinhmunah Mizoramah cheng vaibelchhe 411.19 hu hnathawh mek leh la thawh hmabak an neih thu Minister hi an lo hrilh a. Project thar awm thei turte pawh sawiho nghal niin, la bawhzui zel ni se ti a thu dah a ni.

He hunah hian P&E Minister hi Pu V. Malsawmtluanga, MLA, Vice Chairman, High Powered Committee (HPC) Lunglei, Pi Lalhmingliani Hmar, Secretary P&E Department leh Pu C. Lalropianga, Chief Engineer (Civil) te'n an tawiawm a ni.