Nimin khan Geology & Mineral Resources Minister Pu H. Rohluna chuan Oil India Limited Director (Exploration and Development) Pu S. Mahapatra leh OIL (NEF)-a hotute chu a pisaah kawmin, Mizorama tuialhthei laihchhuah hna thawh mek a an thlenchin leh thawhho zel dan turte an sawiho. He hunah hian Parliamentary Secretary Pu Joseph Lalhimpuia, Industries Secretary Pu Ashutosh Kumar, Geology & Mineral Resources Director Dr. H. Lallenmawia leh officer dangte an tel bawk a ni.

Minister Pu H. Rohluna chuan Mizoram sorkarin a theihna zawnah OIL hnathawhna chu tanpui a inhuam reng thu a hrilh a. Chutihrual chuan tuna OIL hnuaia thawk mek Mizo thalaite chu dah ngheh theih dan ngaihtuahsak turin a duh thu a sawi. Corporate Social Responsibility (CSR) hnuaiah OIL chuan tanpuina tha leh tangkai tak tak an pek thin chu lawmawm a tih thu Pu H. Rohluna chuan sawiin, a dawng tur awm thlan kawngah a kaihhnawih department kaltlanga sem thin ni se, a ti bawk.

Parliamentary Secretary Pu Joseph Lalhimpuia pawhin Mizorama OIL project hnuaia thawk tura Mizo thalaite duhsak bik ni se tih Sorkarin a duh thu chu sawiin, contract mai nilo, regular staff a Mizo thalaite chhawr an nih zel theih nan OIL hotute chuan hma la se a tih thu a sawi bawk.

OIL Director Pu S. Mahapatra chuan Mizoram Sorkar thawhpuina chu lawmawm a tih thu a sawi a. Maubuanga hnathawh mekah metre 496 a thuk laih a nih tawh thu sawiin, rin aia leichhung lung a lo chan avangin an duh aiin an laih chak theihloh thu a sawi a. Keifang, Thenzawl leh Phulmawiahte tuialhthei laihchhuah hna hi reiloteah tan anih tur thu a sawi bawk.

Pu S. Mahapatra hi kumin August ni 1 khan OIL Director (Exploration and Development)-a ruat thar a ni a. Tun tum hi Mizoram a lo tlawh vawi khatna niin, vawiin khan Maubuanga OIL hnathawhna hmun tlawhin a enfiah nghal a ni.