Vawiin khan Parliamentary Secretary Pu Hmingdailova Khiangte chuan Mizoram Youth Commission (MYC) bultuma O2 Academy, Hyderabad-a zir tur thalai 140 vel tana briefing programme, Chatlang YMA Branch Hall-ah buatsaih ah fuihna thusawiin a hmanpui.

Pu Hmingdailova Khiangte chuan MYC in thalaite hmakhua ngaituah, eizawnna lam hawi training leh zirna a buaipui leh hemi lamah theihtawp chhuah a chak taka hma an lak chu fakawm a tih thu a sawi. He hmunah zir tur thalaite chu an vanneizia hriaa an vanneihna dawn chu hmang dik turin a chah a, an nu leh pate leh Mizoram ngahfak an nih tih hre reng turin a fuih bawk a ni.

Parliamentary Secretary chuan heng thalaite hi an zirna hmunah buaina siam zawnga khawsa lova Mizoram leh Mizote ti hmingtha zawnga khawsa turin a hrilh a, thlemna tinreng laka fihlim a, hlawhtling ngei turin a chah bawk a ni.

He hunah hian MYC Chairman Pu T. Sangkunga pawhin thusawiin thalai he course zir turte chu an zirna kawng turah duhsakna hlanin nawmsa zawnga kal lo tur leh an zirna ah theihtawp chhuah turin a fuih a ni.

He hunah hian Labour, Employment & Industrial Training, Director, Pu Rotluanga chuan an hriattur pawimawh te hrilhin phai lamah nunchang uluk leh fimkhur a pawimawh thu te a sawi. Programme hi MYC, Secretary Pu J.T. Vanlalngeta’n a kaihruai a ni.

O2 Hyderabad-ah hian hian thalaite hian thla ruk course – Hotel Management leh Beauty & Spa te an zir dawn a ni.