Vawiin khan Mizoram Youth Commission (MYC) bultuma thalai 31 te Nalanda Institute of Advanced Studies (NIAS) Kolkata-a Bachelor of Hotel Management (BHM) course zir tura thlante thlahna leh fuihna programme DRDA Conference Hall-ah neih a ni a, he hun hi Law Commission Chairman Pu John Siamkunga, MLA chuan a hmanpui a ni.

Pu John Siamkunga chuan Mizoram Labour & Other Construction Workers’ Welfare Board kaltlanga, Mizoram Youth Commission in course puitling, eizawnna tlak tak tak Bachelor of Hotel Management zirna tur thalaite tan an zawnsak chu lawmawm tiin a zir turte chu an vanneih hle thu a sawi. Mizoram Sawrkar chuan thalaite eizawnna atana thiamna pawchhuak thei ang chi (skill development) chu a ngaihpawimawh avang leh thalaite hmasawnna a duh avangin hetiang course te hi Vocational Training Provider te kaltlanga a ruahman a ni a ti.

He course zir tur thalaite chu rilru nei a, tumruhna, tawrhchhelna, taimakna nen an course chu hmachawn turin leh hlawhtling ngei turin a fuih a. Nawmchen tum hmasak loa, hrehawm tawrh te zir a, an nun te uluk leh fimkhur tur te in a hrilh a. Mizote hming ti chhe zawnga khawsa lo turin leh englai pawhin an zirna ngaihsaka theihtawp chhuah turin a chah bawk a ni.

He hunah hian MYC Chairman Pu T. Sangkunga pawhin thusawiin thalai he course zir turte chu an zirna kawng turah duhsakna hlanin nuamsa zawnga kal lo tur leh an zirna ah theitawp chhuah turin a chah a ni.

He hunah hian Labour, Employment & Industrial Training, Director, Pu Rotluanga chuan an hriattur pawimawh te hrilhin phai lamah nungchang uluk leh fimkhur a pawimawh thu te a sawi. Programme hi MYC, Secretary Pu J.T. Vanlalngheta’n a kaihruai a ni.

Zirlai 31 te hian he course hi kum thum chhung an zir dawn a, an zirna senso hi Mizoram Labour & Other Construction Workers’ Welfare Board chuan a tum dawn a ni. He course zir tur hian thalai 10 te chu waiting list a dah an ni.