Vawiin chawhnu khan Chief Minister's Conference Hall ah Pu Lal Thanzara, Minister of State, PWD, Health & Family Welfare etc. hovin Public Work Department hotute leh Class-I & Class-II Contractors hruaitute chu Mizoram a contract hna pek leh thawh chungchang ah an thukhawm.

Meeting kaihruaitu Minister of State Pu Lal Thanzara chuan ram leilungfa Contractor-te chu duhsak theih turin thiamna, hmanrua, hnathawh that kawng ah leh sum chungchangah pawh hnamdangte el pha turin tan la se a duh thu a sawi a. Sum um ringawta contract beisei te, bill a tan vanga hnathawh lai chawlhsan ringawt te leh thawh zawh theih loh tur contract lian beisei ringawt te hi sim a ngai a. Heng te hian hna a tihchhiat mai bak ah ram tana rotling tur tam tak awmze neilovah a chantir thin a ti.Hnathawh that kawnga intihsiakna hian hmingthatna te leh midang tana malsawmna te a thawk chhuak thei tiin contractor-te chu a fuih a. Tunlai khawvel ah Information Technology an hmang nasa a, chumi mil chuan contract te pawh chhan a ngai vek tawh a ni tiin Contractor te chu computer thiamna ah te bo lo tawka thiamna sual chhuak turin a chah a. Tender a thupawimawh inziakte bih uluk tur te leh contract a terms & conditions te zirchiang thin turin a chah bawk a ni.

Contractor Association lam hian an thil ngaih pawimawh deuh deuh pali- PWD Tender amount tam lutuk chungchang, E-tendering, CPWD Manual hman mek anga Rs.15 crore hnuailam Form-8 a tender chhuah chungchang leh Mizoram PWD Manual hman lai chungchang te sawi chhuak in hemi chungchanga an mamawh nia an hriat leh an ngaihpawimawhte an tarlang a. Mizoram a contractor-te hamthat nana Mizoram Sawrkar hmalakna tarlangin PWD hnuaia Central leh State a contract chi hrang hrangte leh an nih phung te chu PWD Secretary Pu Lal Ramthanga, PWD E-in-C Pu R.Vanlaltluanga, PWD CE(Highway) Pu John Rammawia leh PWD CE(Building) Pu C.Lalrinawma ten an sawi fiah bawk a ni.