Mizoram hmundang rualin vawiin khan Champhai Town Hall-ah Champhai District-a NLUP dawngtute tan inhlantharna hun hman a ni a, he hunah hian Education Minister Pu H.Rohluna chu khuallian niin a hmanpui. He hun hi Champhai DC Pu H. Lalengmawia'n a kaihruai a ni.

Pu H. Rohluna chuan NLUP hi chhungkaw intodelhna atana kan hman theihna turin sorkarin thahnem a ngai hle a, a dawngtu mipuite pawhin a hma aia thahnem an ngaih lehzual theihna turin he NLUP revitalization Programme hi District hrang hrangah vawiin hian hman a ni, a ti a. Minister chuan, NLUP hlawhtlinna atan hian sorkar chuan theihtawp chhuah mah se a hlawhtlinna tak tak erawh chu a dawngtu mipui kutah a awm a, he malsawmna hi dinchhuahpuina atan kan hmang lo a nih chuan a bak beisei leh chuan tur a awm lo, a ti.

Pu H.Rohluna chuan, NLUP tanpuina sum hi Central sorkar atanga lokal a ni a, UPA sorkar khan a ngai pawimawh hle a. Tunah pawh NDA sorkar a thlawp hle a. Hei mai bakah hian tunah NLUP ah UNO nena tangkawpin hmalak tum a ni a, MoU pawh ziahfel tawh a ni, a ti.

Minister chuan NLUP anga bultanna tur sorkarin a siam hi a awm zen zen lova, tun bak hi chu huntha kan tawng tawh lo maithei a, hlawhtlinpui tura thahnemngai taka a dawngtuten hma kan lak a tul tih sawiin, hmala tha duh lo leh dinchhuahpui tuma beitute chu tunah pawh hian an dinhmun a inthlau hle tawh a ni, a ti a. Sorkar hmalakna ni mah se sorkar chuan a tihtur a ti a, mipui lamin kan tih ve tur kan tih a tul a ni, a ti a. Mizoram pum thlirin NLUP chu a hlawhtling thawkhat nia a lan thu leh, chu chu lawmawm a tih thu te, Line Department-te chu NLUP dawngtute hmalak danah survey tha zawk nei tura beisei an nih thu te a tarlang bawk a ni.

NLUP inhlantharna hunah hian Line Department hrang hrang 6 ten NLUP-a hma an lak dan report an pe a. A tlangpuiin Champhai District-ah chuan NLUP dawngtu zingah hma la tha lo an tam loh thu leh, hmala tha lote chu umzui zel an nih thu te an tarlang a ni.