Vawiin chawhma ah khan Film and Cultural Development Society of Nort East leh Information & Public Relations Department tangkawpin a buatsaih, ni 2 chhung awh tur ‘Documentary Film Festival on Music & Art’ chu I&PR Auditorium ah tan a ni.
Pu Rahul Jain, Secretary, Film & Cultural Society of North East chuan Mizoram ah Film siamtute leh thalaiten Film culture hrisel an neih theih nan leh film tha ngaihlut nachang an hriat theih nan he film festival hi huaihawt anih thu sawi a. Film Culture hrisel an hlutna hmun apiang ah vantlang nun leh chhungkaw nun a thianghlim in a hlimawm thin a ni a ti.
‘Documentary Film Festival on Music & Art’ hawngtu Pu Jim K. Chozah, Director, I&PR pawh in thusawina hun hmang in Television channel tam tak ah film entlaklo hmuhnawm si Mizo mipuiten kan en nasat thu a tarlang a. Heng film entawn tlak loh hian Mizo thalai tam tak kawng diklo a kawhhmuh ang tih a hlauhawm hle a ni a ti a. Film thianghlim, hmuhnawm, hrisel leh entute tana bengvarna ang chi chhungkua a en tlan ngam awm ni bawk si , mimal leh khawtlang nun ti hmasawn thei tur ni bawk ngaihven a ngaihhlut a hun tawh a ni a ti. Chief Minister Pu Lal Thanhawla’n Mizoram ah film siam tih hmasawn a nih theih nan nasa taka hma a laksak reng thu sawiin kum liamta leh kum in chhung pawh in Film siamtu te tan film festival,workshop leh exposure tour I&PR kaltlangin a lo buatsaih tawh thin a ni a ti a. Film siam tih hmasawn nan Mizoram Sawrkar in Rs 10 lakh kumtin sawkar recurring budget ah a dah sak thin thu a sawi a. Mizoram sawrkar hmalakna than an tih avangin Mumbai Film Festival,Film division, Ministry of Information & Broadcasting hnuaia awm chuan Aizawl khawpui hi an film festival huaihawtna tur hmun kumhlun ah a thlang tawh ani a ti.
Thusawitu dang, MFDS member aiawh a lo ding chhuak chuan Mizoram in Film tih hmasawnna atana kum 4 liam ta a bul a lo tan tawh chu chak zawka sawrkar in a kalpui theih chuan a lawmawm tur thu a sawi a. Nodal department, I&PR nen a thawhhona hnuai ah nasa taka hma an sawn chhoh zel a rinawm thu a tarlang a bawk a ni.
Documentary Film Festival on Music & Art hawnna programme hi Pi Lalnithangi, Joint Director, I&PR in a kaihruai a. He hunah hian Mizoram Film Development Society(MFDS) leh Mizoram Art Development Society atangin member thahnem tak an tel bak ah Chanchinbu mi leh College a zirlai te pawh an tel a ni. Festival hawnna programme hman zawh ah hian ‘Brush with Life’, Indian Artist ropui Pu Satish Gujral chung chang documentary film a buatsaih chu Cinema ah chhuah nghal a ni a. Vawiin chawhnu leh naktuk nileng hian Film Festival hi hman chhunzawm a ni dawn a. Hemi hun chhung hian a duh apiang te chhim theih in Music leh Art Documentary film 7 chhawp chhuah a nih dawn bakah chawlh lawk neih hun a piang in sawihona, zawhna leh chhanna hun neih a ni ang.
