School Education Minister Pu H.Rohluna chuan vawiin khan Govt. Republic High School- Kum 2016-17 School Academic session atana School hawn ni  a hmanpui a. School Education Department, MBSE, SCERT Department-a officer-te leh DIET lecturer-te pawhin insemdarhin sorkar School an tlawh kual nghal bawk a ni.

Zirna hi engkim bul a ni a, mihring leh ram hmasawnna hi zirna atanga lo kal a ni a. Ho lam deuha zirtirna  pek chuan hnamin a tuar thei tih sawiin Pu H.Rohluna chuan Zirtirtute tana pawimawh ber chu zirlai naupangte an ni a, zirtirtute chu zirlaite tan nu leh pa, hruaitu, thian leh innghah ngamna tling  an ni tur ani tiin  a fuih a, naupangte tan hma lam eng tak siamsak tura theihtawp chhuah thar turin zirtirtute chu a sawm nghal bawk. Zirna lama hmasawn duh avang leh thil kalphung tha zawk neih theih nan school hawnniah amah leh officer-ten insemdarhin school an tlawh kual tih  sawiin Monitoring & supervision chu mumal taka kalpui chhoh tum a ni a, hemi atan hian hma lak mek a nih thu a sawi. 

Education Minister chuan Tata Institute of Social Sciences (TISS)-te nen Connected Learning Initiative (CLIx) chu tunah hian kalpui a ni dawn a, Mizoram-a naupangte computer hmanga zirtirna an pek an ni anga, Subject pawimawh pathum- English, Science leh Mathematics-te chu computer hmang hian zirtir tur an ni in tunah hian inbuatsaih mek a ni a tia.. Khawi hmun atang pawha School dinhmun en theihna tur School Mapping, Chief Minister-in a hawn tawh chu tihchangtlung lehzual tum mek a niin Zirtirtu ten training-naa lesson plan an zir thin ang chu school-ah a taka kalpui a, naupangte zirtir nan hmang turin a fuih bawk.

Primary atanga High School thlengin zirtirtu post ruak 1249 a awm a, hengte hi sum awm dan azir zelin a tah tawla hnawhkhah tum a nih thu Pu H.Rohluna chuan sawiin High School ah mathematics teacher 68, Science teacher 47 atan special recruitment ti tura hma lak mek a nih thu leh Zirtirtute mawhphurna hi a sang hle a, he mawhphurhna atan hian sorkarin zirtirtute chu a ring ngam a, a rin ngam ang ngeia chak taka hma lak a pawimawh thu a sawi.

School Education Parliamentary Secretary Pu Joseph Lalhimpuia tuna Myanmar-a zin mek chuan School hawnniah hian zirlaite leh zirtirtute chu chibai bukin school tanni atanga kum tawp thlenga zirlaiten hlawhtling taka an zir theih nan leh tluang taka zirtirtuten zirtirna hna an thawh theih nan duhsakna a rawn hlan.

School hawnni-ah hian School Education Department ruahman angin District hrang hrangah Officer-te chuan sorkar School Primary atanga High school an tlawh kual a, Aizawl khawpui chhunga school an tlawh kual zat hi 172 a ni a, School tlawh kual bakah hian khawtlang hruaitu local council/village council-te kaihhruaina hnuaiah zirtirtute nen inkawmhona hun hman nghal a ni. Aizawl District leh District dangah pawh Minister-in school a tlawha hun a hmanpui dungzuiin Minister-in zirtirtute a fuihna thuchah chhiar chhuah a ni a, zirtirtuten inpekna thar an neih theih nan intiamna an nei a, Zirtirtute attendance lak vek a ni bawk. School hawnni-a tuam hman lohte chu kar leh chhunga tuamchhuak vek tura ruahmannasiama ni bawk.VawiinSchoolhawnnia hmun hrang hranga Zirtirtute leh khawtlang hruaitute nena inkawmhonaah hian monitoring and supervision atana register/document vawn turte inhrilhfiah a ni a, monitoring and supervision hi awmze nei zawka kalpui chhoh zel tum a ni. ‘Code of professional ethics for teachers’ bawhzuiin Headmaster tinte chu an school theuhah hma la zui tura tih an ni a, Integrated Evaluation Scheme kumin atanga hman tur chu Govt. Republic High School-ah hian veng chhunga zirtirtute leh khawtlang hruaitute nen meeting neih a ni a, inhrilhfiah zui nghal a ni.