Mizoram sorkar in NLUP kal tlanga UN Agencies 4 a thawhpui mek zinga pakhat, ILO(International Labour Organisation) atangin Decent Work Team for South Asia and Country Office in India hotu te chu Mizoram ah an lo kal a. Vawiin khan Chief Secretary’s Conference Room ah NLUP changtu leh Home Minister ni bawk Pu R.Lalzirliana, hovin NLUP Implementing Board Chairman Pu J.H.Rothuama, State Planning Board Vice Chairman Pu H.Liansailova, NIB Vice Chairman Pu P.L.Thanga te nen Mizorama ILO hnathawh chhoh zel dan tur te an sawi ho va. Hemi atan hian ILO in Mizoram zirchianna an neih te en milin policy framework siam ni se tiin an rel.

Home Minister hova meeting neih hma hian ILO hotute chuan Chief Secretary hovin Secretariat Conference hall ah meeting an nei a. Hetah hian Pu Partha Banerjee, Director, DEFT Advisory and Research Pvt.Ltd chuan Mizoram dinhmun zirchianna an lo neih te leh rawtna chi hrang hrang an neih te a sawifiah a. Thalai ten hna tha an thawh theih na tura thiamna pek leh an theihna tihpun sak tura zirtir leh kawng kawh hmuh dan tur te zir ho a ni. He Committee hian Core Committee din ni se, a ti a. Chief Secretary chairmanna hnuaiah Skill development kaihhnawih department Secretary te nen Core Committee hi din tura ruahman a ni.

Home Minister hova meeting chuan chawhma lama Chief Secretary hova meeting in rawtna an neihte chu kenkawh ni se a ti a. Thalaite hna thawk thei tura buatsaih leh hna thawh tur siam sak te, infrastructure dinna tur atan a ILO in rawtna a neihte chu Core Committee hian uluk taka thlirin policy framework a duang ang a. Hei hi sorkar in a tul angin a lo bawhzui dawn a ni.