Nimin khan Govt.Kawrtethawveng Middle School-I Kum Sawmruk tlin Diamond Jubilee lawm a ni a, Pu H.Rohluna, School Education, Commerce & Industries, Geology & Mineral Resources Minister leh Bialtu MLA Pu Lalrinmawia Ralte ten he hun hi an hmanpui.
Minister chuan Govt.Middle school-I Headmaster leh zirtirtu te chawimawi an phu takzet a ni, a ti a, sawrkarin zirna a ngai pawimawh a, hun reilo te ah hmasawnna tamtak kan hmuh thuai a beisei thu a sawi. Tunah hian Middle school chin zirlaibu hi NCERT kan hmang tan a, text book chhah pui nilovin mithiam te buatsaih activities tamtak zirlai ten nuam ti taka an zirlai an zir theih nan a buatsaih a ni, a ti. Zirlai ten byheart system a kal lovin joyful learning system a an zir hi kan Education system tumber a ni, a ti bawk. Middle schoola pawlruk atanga pawlriat zirlai te chu English Medium ah lehlin vek tawh niin, School compound ah Zirlaite leh Zirtirtu te chuan english tawng hmang turin a chah a, School Headmaster te Recruitment Rules (RR) pawh tihdanglam niin za a sawmnga (50%) ve ve seniornity leh Limited Departmental Exam (LDE) atanga kaisan theih tura duan a ni a, hun reilo te ah Headmaster tha tak tak kan nei thuai ang a ti. NEDP hnuaia hmasawnna ruhrel ( infrastructure) te tih chang tlunnan a theih ang a ruahmanna kalpui tum a ni a, Kawrtethawveng Govt.High school building chhe zualpui te chu a remchan dan ang a thuam that tum a ni ang, a ti bawk.
Bialtu MLA Pu Lalrinmawia Ralte pawhin zirlaite chu nu leh pa te thuawih turin a chah a, nu leh pa te pawhin kan fate private school emaw, Govt.school emaw a kal te chu thliar hranna engmah neilovin ngaihsak tha a, an mamawh ang ang lo phuhruk sak turin a chah bawk.
Govt.Kawrtethawveng M/S-I hi 9.5.1957 a din niin, mi hlawhtling tamtak he school atang hian anlo chhuak tawh a, chung zingah chuan Minister, MLA, AMC Councillor, Sawrkara hna sang tak dinhmun pawimawh tak tak chelh mek te, Padma Shree dawng tawhte, infiammi tha tak tak te bakah Pastor pariat lai an lo chhuak tawh bawk a ni.
Minister chuan Jubilee lungphun hawnna a nei a, bialtu MLA he Middle School-a zir chhuak leh zirtirtu a lo tang tawh Pu Lalrinmawia Ralte chuan Diamond Jubilee Gate hawnna hun a nei thung a ni. Jubilee neitu zirlaiten Minister hi zai leh Dumbel Exercise show hmuhnawm tak an lo entir bakah he school atanga mi hlawhtling te thlalak album entirna hun neihpui niin, Minister hian school compound ah bung thingtiak a phun bakah he jubilee puala Souvenir buatsaih chu a tlangzarh bawk a ni.
Jubilee lawmna programme hi thuanghnih a then niin, Zingkar programme hi Pi Lalthanpari VCP & Organising Vice chairman ni bawkin a kaihruai a, Chawhnu programme hi Pu Darthangliana Govt.M/S-I Headmaster leh Organising chairman ni bawk chuan a kaihruai thung a ni.
Minister Pu H.Rohluna hian vawiin hian Mamit khawpui chhung a a department chan, District Industries Centre ( DIC), Sub-divisional Education Officer (SDEO) leh District Institute of Education & Training (DIET) office bakah DIET building sak thar te tlawhin an hmunhma leh an hmalakna te bakah an harsatna hrang hrangte sut kian a hmalak dan tur deparment official te leh khawtlang hruaitute nen sawiho na hun tha tak an nei nghal a ni.
