World No Tobacco Month pualin nimin khan Lawngtlaia Food and Drug Administration (FDA), Anti-Tobacco Squad (ATS), MHIP leh Police te chuan joint operation neiin, Lawngtlai khaw chhunga dawr te an en fiah a. Dan phal loh vaihlo leh a kaihhnawih an zawrhte an mansak.
He joint operation-ah hian nicotine leh vaihlo telna zuk, hmuam leh ei tur zawrh phal loh zuar an awm leh awm loh endik a ni a. Gutkha product chi hrang hrang leh contraband cigarette eng emaw zat man a ni. He'ng an thil mante hi Shikhar box 30 leh pouch 93, S-Ten box 56 leh pouch 134, Farstar carton 50 leh pack 3, Valiant carton 51 leh pack 3 niin, dawrkaite chu zuar nawn tawh lo tura ngen nghal an ni a. Thil mante hi dan anga tih ral atan dah that rih a ni.
Mizoram sawrkar chuan August ni 22, 2012 khan Gutkha product reng reng zawrh khapna (Notification) a lo chhuah tawh a. May ni 28, 2015 khan Gutkha product siam chhuah, sem darh leh kawl khapna (Notification) a chhuah leh bawk a ni.
