Nimin tlai khan Chief Minister  Pu Lal Thanhawla chu cricket enkawla India a thuneitu sangber Board of Control for Cricket in India (BCCI)  Affiliation Committee  Member pahnih - Pu Prakash Dixit leh Pu Anshuman Gaikwad ten a chenna in CM Bangla ah an hmu a, Mizorama cricket hmasawnna tur chunchangte an sawiho a, Cricket Association of Mizoram (CAM) in BCCI a zawm theina  (affiliation) chungchangte an sawiho bawk a ni.

Chief Minister Pu Lal Thanhawla chuan CAM bultan dan te sawilangin CAM in BCCI a zawm remtihna chu 2012 khan khatih laia BCCI President Pu Jagmohan Dalmiya kaihhruaihna hnuaia Committee in a thuphungin a pe tawh a, mahse hmalakna engmah a awm ta lo tiin tunah BCCI Affiliation Committee in CAM in affiliation a neih theih nana  Mizoram dinhmun zirchiang tura an rawn thawkchhuak  chu lawmawm a tih thu Affiliation Committee Member te a hrilh a. BCCI Affiliation Member te chuan Aizawl leh a chhehvelah cricket hmunhma leh cricket khelhna ground te an tlawh thu Chief Minister hrilhin Mizorama cricket a lar chho mek leh a hmuhma te buatsaih mek a ni chu lawmawm tiin thil neiha tlemte (limited resources) hmanga Sawrkar leh CAM in cricket hmasawnna atana an hmalakna te chu fakawm an tih thu an sawi a. Hmun rem lo tak tak ah pawh infiamna hmunhma buatsaih a ni chu entawntlak nia an hriat thu sawiin Mizoram Aizawl Football Club in I League a an Champion chu an lawmpui thu an sawi bawk a ni.

BCCI Affiliation Committee Member pahnih te hian nimin khan Suaka Memorial Cricket Ground, Sihmui leh Aizawla cricket khelhna ground dang pahnih - Ramhlun Sports Complex leh Durtlang te an tlawh a, an thil hmuh dan Report hi BCCI ah an thehluh hnuin affilation hi BCCI in an ngaihtuah dawn a ni.

Cricket Association of Mizoram  hi 1992 a din niin a tirah chuan Club 5/6 chiah a awm a, tunah hian Club 35 bawr vel an awm nia hriat a ni a. Chief Minister Pu Lal Thanhawla hi CAM President ni lai mek a ni.