Vawiin khan Commerce and Industries Minister Pu H.Rohluna’n Mission Veng Bazar Complex Building sak thar a hawng. Hawnna inkhawmah hian bialtu MLA Lt.Col.Z.S.Zuala chu khual zahawm a ni. 

Pu H. Rohluna chuan mihring hriselna turin thianghlim taka ei tur zawrh leh sawng bawl a tul a, kawngpui sira in pho thin thlai thar zuartu engemaw zat bazar building sak tharah an insuan lut thei tawh dawn a, hei hian hriselna lamah hmasawnna a thlen ngei a beiseiawm, a ti. Mizoram hmun hrang hrangah market building sa in department in nasa takin hma a la tiin Pu H.Rohluna chuan NEDP sum hmangin wholsale market sakna tur ruahmanna siam a nih thu leh Aizawl chhim lamah Ngaizelah, hmar lam kawtchhuah Sihphirah te dah a ni dawn, a ti a. Bawngkawn market building tih len hna thawh mek a nih thu te, Sairangah market building sak mek a nih bakah Thenzawl, Saitual, Kanhmun leh hmun dang dangah sawrkarin hma la mekin hmachhawp pawh engemawzat a awm thu Minister chuan a sawi. Agricultural Produce and Livestock Marketing (Promotion and Facilitating) Act chungchang sawi langin Commerce and Industries Minister chuan department mal anga tihpuitlin theih a nih loh thu leh line department hrang hrang te nen inrawn khawmin draft bill duan a nih thu te,  Central Sawrkarin Model Act  vawi tam tak tihdanglam avangin peihfel mai theih a nih loh thu a sawi a. Thawktuten theih tawp an chhuah avangin tunah hian draft bill chu Law Department lamin an vet tawh a ni, a ti bawk. 

Khual zahawm Lt.Col.Z.S.Zuala pawhin Market Building hawn a ni ta lawmmawm a tih thu sawiin veng tana sawrkar thilpek ropui tak a ni, a ti. Building tha taka sak a nih theih nan thawktute leh a viltu khawtlang hruaitu leh tlawmngai pawlte fakawm a ti a, he building puitlin theih nan hian Local Council, YMA, tlawmngai pawl dangte leh veng chhung nu leh pa te an tel vek a ni, a ti. 

Mission Veng Bazar Complex Building sak nana sum sen zat chu cheng nuai 598.41 a ni a. August 1, 2015 ah sak tan niin July 31, 2018 ah sak zawh a ni. Building hian chhawng thum a nei a, thlai thar leh thil dang zawrhna tur bakah NLUP trade atan stall 10 siam a ni a, lirthei engemawzat hun theihna tur siam a ni bawk. Chhawng tin floor zau zawng belh khawm hi 2255.30 sq.m. a ni. 

Hawnna inkhawm hi Commerce and Industries Department Joint Director Pu H.D.Lalrintluanga’n a kaihhruai a, PWD Project Division I EE Pu Hrangthanga Zote chuan technical report pe in Mission Veng Local Council Chairman Pu Lalchhuanawma’n lawmthu sawiin hun hnung a khar a ni.