Vawiin khan Siamliana Hall, Mamit-ah Pradhan Mantri Awas Yojana ( PMAY) hnuaia insak tanpuina dawng turte kohkhawm niin PMAY awmzia leh kalphung inzirtirna leh inhrilhhriatna hun neih a ni a. He hun hi Pu Lalrobiaka, MLA Dampa Constituency, ZIDCO Chairman ni bawk chuan khuallian niin a hmanpui.

Khuallian ZIDCO Chairman chuan India ramah in leh lo nei lo, in leh lo neisa pawh chei tha thei lo tam tak kan awm a. Chumi hria chuan khawpuia puan bikte tan Central Sorkarin PMAY Scheme tha tak mai a ruahman chu lawmawm a tih thu sawiin heng tanpuina te hi a nihna tur ang takah kan hmang tur a ni a ti. Sorkar chu mipuite tan a ding a, mipuite pawhin kan tih tur tak kan ti ve tur a ni tiin tanpuina sum kan hman dan chu kan Kristianna leh ringtu kan nihna lanna tur a ni a ti bawk. 

Pu Lalrobiaka chuan insak tanpuina sum duh si, insak hnu-a insak tanpuina dawng tih chhinchhiahna ziahlan leh duh si lo tam tak an awm thu sawiin kan nihna angin kan lang ngam tur a ni a. PMAY-ah hian insak tanpuina dawng chhinchhiahna tar ang chi a awm a nih pawha tar hreh lo turin kalkhawmte a chah. Rinawmna, taihmak leh bei fan fanna nen chauh hlawhtlinna a neih theih a ni a ti bawk.

He hunah hian Pu Michael Lalneihtluanga, Information Education and Communication Specialist, Directorate of UD&PA chuan PMAY kalphung leh awmzia bakah mipuite tih tur hrang hrangah zirtirna pein kalkhawmte atangin hriatfiah loh zawhna leh chhanna hun hman nghal a ni bawk.

PMAY - Housing For All dawng tura thlanchhuah hi Mamit khawpui chhungah chhungkaw 209 niin Documents pawimawhte an tihfel hnu-ah an Account-ah tanpuina sum hi a lut dawn a. Tanpuina sum hi 1st Instalment-ah Rs 60000/- (Singruk), 2nd Instalment-ah Rs 60000/- ( Singruk) leh 3rd Instalment-ah Rs 30000/- (Singthum) an dawng dawn a ni.

He hun hi Pu H.D Lalpekmawia, DUDO, UD&PA Dept. Mamit-in kaihruaiin Mamit khawpui chhunga PMAY 1st Batch dawng tur chhungkaw hrang hrang aiawhte an kalkhawm a ni.