Vawiin khan Chief Minister Pu Lal Thanhawla chuan Dawrpui Multi Level Parking, Community Centre and Office Complex a hawng. Finance Minister Pu Lalsawta, Dawrpui bialtu MLA chu khualzahawm a ni.

Chief Minister chuan Dawrpui vengchhung mipuite mamawhna phuhruk tur mai nilo, Zoram mipui zau zawkte pawhin an chhawr ve tur Multipurpose Centre tha tak hawn theih a ni chu lawmawm a tih thu a sawi a. Aizawl khawpui lun lai ber a lirthei dahna awm tlem avanga kawngpui tawt lutuk ti thawl tu a nih a beisei thu a sawi. Damdawi In bul a awm a nih avangin chhiat tawh changa hman tangkai tur Morgue Centre dah tel a ni chu lawmawm a ti bawk. Pu Lal Thanhawla chuan Multipurpose Centre thar chu khawtlang ta a nih avangin a hmangtu apiangten a enkawl naah mawhphurhna an nei tih hre vek se duh thu sawiin, fai leh dimdawi taka vawng reng turin kalkhawmte a chah a. Faina hi mitin nunah, mahni chenna in emaw pawn kan chhuahvah naah pawh ni se kan vawng tlat tur a ni, a ti.

Minister Pu Lalsawta chuan vengchhung mipuite thawhhona zarah Dawrpui Multipurpose Centre hawn a ni thei ta chu lawmawm a tih thu a sawi a. Dawrpui chu Aizawl District Civil Hospital awmna a nih avangin damdawi in a thi an awm changin ruang buaipui a veng thalai te an che chhuak in an thawk nasa thin hle a ni tiin bialtu MLA chuan an tlawmngaihna chu fakawm a ti a. Ruang dah lailawkna tur pawh he centre-ah hian siam a ni leh zel chu chhiat tawkte tan leh tlawmngai lawlte tan a tangkai hle dawn a ni, a ti. 

Vawiina Dawrpui Multipurpose Centre hawnna inkhawm hi Sports & Youth Services Dept. Secretary Pu Lalthangliana Sailo chuan a kaihruai a, Pu Lalrammuana, Chairman, Dawrpui Multi Level Centre chuan thusawi bawkin, Pu Lalruatkima, SE, Project Circle, PWD chuan he building hi sak a nih dan report tlangpui a pe a ni.

Dawrpui Multi Level Parking, Community Centre and Office Complex hi NLCPR sum bultum a 27.7.2015 khan sak tan a ni a. A sakna atan a sum hman hi Rs. 880.96 lakhs a ni a, M/s Mechfab Engineering Industries Pvt. Lt. Guwahati te chu Contractor niin, Mizoram PWD in a building design hi an duang a, 5.9.2018 khan sak zawh a ni. Multipurpose Centre hi chhawng nga (5) a sak niin, Ground Floor leh 1st Floor hi parking atan ruahman a ni a, 2 wheeler 18 leh LMV 54 a leng. 2nd Floor ah Morgue & Prayer Hall, Information Hall, Library, Choka, Health Sub-Centre, Committee Room pahnih, Store Room, Janitor store leh toilet a awm a. 3rd Floor ah Hall leh Green Room awm in, 4th ah Store Room dah a ni bawk.