Vawiin khan Mizoram Institute of Medical Education and Research, State Referral Hospital, Falkawn ah Intensive Care Unit, Blood Bank, Oxygen Generating Plant leh Bio-medical Waste Incinerator Plant thar hawnna hun hman a ni a, Health & Family Welfare Minister Pu Lal Thanzara chu Khuallian niin Agriculture Minister Pu KS Thanga chu Khual Zahawm a ni a, Pu Lalrinliana Fanai, Commissioner & Secretary, Prof. L.Fimate, Director MIMER, Dr Lalhmuchhuaka, Medical Superintendent, MIMER a thawkte leh zirlaiten he hun hi an telpui a ni.

Health Minister chuan Teaching Hospital tih changtlunna tura kan hmalaknaahte hlawhtlinnna kan hmu zel hi a lawmawm hle a ni, a ti a, Aizawl Civil Hospital a kan ICU neih te hi kan in chanlo nasa hle a State Referral Hospital ICU a khum 20 awm belh tur hi Zoram mipuite tan a tangkai hle dawn a ni, a ti. Pu Lal Thanzara chuan CT Scan leh MRI thar bun mek a nih thu tarlangin, thla khat chhungin hna hi zawh hman beisei anih thu leh kum tawh ah hman theih a beiseiawm thu a sawi bawk.

Khual Zahawm Pu KS Thanga, Agriculture Minister chuan kan ram a Medical College ngeiah Mizo thalai Doctor zirlai thahnem tak hmaah thu sawi thei a ka awm hi ka lawm hle a hmasawnna ropui tak a ni, a ti a, Hospital atanga bawlhhlawh chhuak hrang hrang sawngbawlna tur khawl tha tak tak kan bun ta hi heti lai khawtlang tan a thlamuanthlakin a lawmawm tak zet a ni, a ti bawk.

MIMER a khawl thar hawnna hunah hian Health Minister chuan MPCC aiawhin State Referral Hospital a Poor Fund atana hman tur Cheng Nuai 1 a hlan a , Dr Lalhmuchhuaka’n Technical report te pein Dr L Fimate in lawmthu sawinna in hun tawp a hmang bawk.

Intencive Care Unit ah hian khum 20 awmin MCI kalphung ang thlapin buatsaih a ni a, General ICU khum 10, Neonatal ICU Khum 5 leh Surgical ICU Khum 5 awmin cheng Nuai 290 sen a ni. Blood bank ah hian thisen sawngbawlna khawl hrang hrang awmin Blood Group hrang hrang dawn te dah that leh pe chhuak reng theih tura ruahman niin Cheng Nuai 360 sen a ni. Oxygen Generating Plant hi Cheng Nuai 190 man niin Bio Medical Waste Incinerator Plant hi Cheng Nuai 300 man a ni a, darkar khatah bawlhhlawh Kg 100 a rit hal ral theih a ni.