Vawiin chhun khan Excise & Narcotics Minister Pu JH Rothuama chuan Commissionerate of Excise & Narcotics Hall-ah Aizawl District chhunga Excise & Narcotics Officer-te inkawmhona a neih pui.

Pu JH Rothuama chuan Excise Department-in hmingthat a hlawh tak tak theih thin lohna chhan chu hna kan thawh that loh vang nilovin, mipuite beiseina a san lutuk vang leh an beisei ang kan phak loh thin vang a ni a ti a, Excise Department hian hna khirh tak kan thawk a, kan phur pawh hi a rit a, chuvangin theihtawp kan chhuah piah lamah theihtawp dang chhuah leh tura tan lak a ngai a ni a ti bawk.

Officer kalkhawmte chu fuihin Minister chuan Department dangte aiin thlemna kan tawk nasa a, chuvangin kan thil hmuh leh mante lakah hian kan fihlim a tul a ni a ti a, hmingthat hlawh a har em em laiin hmingchhiat erawh a awl em em a, tuna Department-in hmingthatna leh fakna a hlawh mekte chawi nung zel tur leh chhungte tan, khawtlang tan leh ram tan malsawmna thlen tu ni turin insumtheihna leh rinawmna nen huaisen taka kal turin a chah a ni.

Minister chuan Department in harsatna a tawh hrang hrangte sawilangin Department dang nen khaikhin phei chuan kan la pachhe em em a, hei hi Sawrkar hotute pawhin an hriatpui tawh thu leh Chief Minister ngei pawhin a ngaihpawimawh thu a sawi a, mamawhte neih zel anih theih nan theihtawp chhuaha tan lak a tum thu sawiin Chief Minister Pu Lal Thanhawla nen remchang hmasa berah Department tihchangtlunna tur ngaihtuah tura Sawrkar laipui dawr tura kal an tum thu a sawi bawk.

Minister chuan ruihhlo dona kawnga Sawrkar hmalaknaah CYMA in an thlawp that avanga lawmthu sawiin Excise & Narcotics hotute pawh CYMA te nena thawhhona tha tak nei zel tura a beisei thu a sawia, ruihhlovin thalaite a tibuai nasain ram leh hnam hmasawnna daltu lian tak a ni a ti a, ram nghahfak thalai tam takin an thihpui avangin theihtawp chhuah a rinawmna leh huaisenna nen kan thalaite leh kan fate nun humhima, ram leh hnam dinchhuahna kawnga an mawhphurhna lian tak hlen chhuak turin a fuih bawk a ni.

Minister chuan Officer kalkhawm hnenah tisa leh thlarauva piantharna neih a tul thu sawiin, kristian ram kan nihna ang ngeia Pathian thu nena tan la thar turin leh thil tha lo veng tura an mawhphurhna leh tih tur hrechiang a, hawihhawmna nen "Professional" taka an hna thawk turin a chah a ni.

Ministerin thu a sawi zawh hian inkawmkhawmna hun hman a niin Officer ten an mamawh leh harsatnate Minister hnenah hian an thlen a, Minister pawhin a theih dan ang anga hma lak sak a tum thu a sawi bawk a ni.

He inkhawmah hian Excise & Narcotics Department hnuaia hna thawk tha Mizoram sawrkarin a thlanchhuah mi 36 hnenah lawmman Minister hian a hlan a ni.

He inkhawm hi Pu Lalbiakmawia Khiangte, Commissioner, Excise & Narcotics in a kaihruai a, Aizawl District chhunga Excise & Narcotics Officer, ASI chin chu an tel kim hle a ni.