Panchayat Yuva Krida Aur Khel Abhiyan (PYKKA) hnuaia Mizoram pum huap inelna, State Level Competition 2009-2010 chu vawiin atanga neih tan a ni ta a. A hawnna inkhawm 3rd MAP Khelmual-a buatsaih ah Sports Minister Pu Zodintluanga chu Khuallian niin he Intihsiakna hi a hawng.
 
 

PYKKA State Level Competition ah hian Mizoram district 8 atangin infiammi sang khat vel tel tura beisei an niin infiamna chi hrang hrang, footbal, hockey, volley ball, basket ball, Judo, Taekwando, table tennis, boxing, badminton leh athletics ah te intihsiakna neih a ni dawn a. November 12 thleng he Intihsiakna hian a awh ang.

Hawnna thuchah sawiin Sports Minister Pu Zodintluanga chuan India sorkarin thingtlang naupangte zingah infiamna lama khawvel pum hawlh chhuak thei tur talent a awm tih a hria a. Chutiang mite zawn chhuah leh buatsaih nan PYKKA chu duan a ni tih a sawi a. He programme hnuaia state level competition neih mek chu thalaite intihhlimna  atana buatsaih a ni lo tih sawiin heta tang hian thingtlang hmun hrang hranga naupang infiammite, India ram leh khawvel pum hriat hlawh thei tura pho chhuah chu he programme thil tum a nih thu a tarlang a. PYKKA chu kum 18 hnuai lam chinte tana buatsaih a nih angin infiammite chu mahni kum dik tak  sawi a, dikna a bul tan turin Minister chuan a chah a. Mizoram sorkar “Catch Them Young” policy nena kalkawp a nih avangin kum thar lamah chuan kum naupang zawkte thlang chhuak a, India ram aiawh thei tura beisei awmte chher turin ruahmanna neih a nih thu a sawi bawk a ni.

State Level Competition hawnna inkhawm hi Pu Lianzuala, Secretary, Mizoram State Sports Council chuan a kaihruai a. Thusawitu dang, Pu Zoliana Royte, Secretary, State Level Committee PYKKA chuan nakum-a India ramin Commonwealth Games a thlen turah Commonwealth Games Meichher chuan Aizawl a rawn paltlang tur thu sawiin Meichher hi Imphal atangin helicopter-a Aizawl rawn phurh thlen tur a ni, a ti a. Zemabawk atanga Kulikawn thleng tlanpui a ni dawn tih sawiin Meichher tlanpui na ah hian infiammite chu tel vek turin a ngen a Mizoram sorkarin infiamna tihmasawn tura hma a lak mekah Rajiv Gandhi stadium sak mek leh heta phaitual hnim lem phah tur te, Thenzawl hockey coaching centre a phaitual hnim phah tura hmalak mekte chu a tarlang bawk a ni.

State Lelvel Competition hawnna inkhawm neih zawh hian Pu Zodintluanga chuan Mualpui-a Rajiv Gandhi stadium sakna tur chu a hmunah chipchiar taka fangin PWD Engineer te leh 3rd MAP hotute nen hmalak tawh dante a en nghal a. He stadium sak hna hi ngawrh taka thawh mek a niin tunah hian retaining wall siam hna kalpui mek a ni.
 
 

Attachment

  • Loading attachment...