Ni hnih thangin Supply Department, Tourism leh Transport Department Minister Pu John Rotluangliana chuan a department-te hmalakna leh ruahmanna te, an hmunhmate a fang.
Pu John Rotluangliana chuan 30.4.2014 khan Mualkhang-a Gas Bottling Plant chu a tlawh a; Mizoram-in hnianghnar taka LPG kan neih theihna tura gas bur ruak thunkhahna hmun changtlung zawk neihdan turte IOC hotute nen an sawiho a ni. IOC lam chuan Mualkhang-a LPG Bottling Plant aia lian din turin Sihhmui-ah ram acre 25 vela zau Mizoram sawrkarin a ruahmansak theih chuan chawlhkar khat tla tur LPG an chhekkhawl theih tur thu Minister hi an lo hrilh a. Pu John Rotluangliana chuan IOC ram beisei chu a rang lama ama hova enfiah a nih tur thu a sawi. Tuna Mualkhang hmuna Gas thunkhahna hmunpuiah hian metric tonne 99 chhekkhawl theih a ni a; hei hi Mizoram pumpui mamawhna atanga chhuta ni 2 tla a ni.
Tourism Minister a nih angin Pu John Rotluangliana chuan ni 30.4.2014 khan Serlui B Hydel Project behchhana khualzinmite hipna tura ruahmanna hrang hrang siam dan tur a en a. Tourism Department chuan tunah hian Serlui B Hydel Project dil kamah mikhual thlenna tur in changkang tak a sa zo tawh a; sak belh turin ruahmanna a awm mek bawk. Serlui B Hydel Project hmunah hian Tourism Department chuan intihhlimna leh tui lama infiamna chi hrang hrangte siam a tum mek a, nimahsela, he tuikhuahin a chim hnan thing leh maute an la tawih ral loh avangin chak taka hmalak theih a ni hrih lo a ni.
Pu John Rotluangliana hian Vairengte-a Transport Department hnuaia Weigh-Bridge dahna tur ram remchang turte a en bakah, Supply leh Transport check-gate te a tlawh a, an mamawh leh inthuam phuisuina turte department hotute nen an enfiah a ni.
1.5.2014 khan Transport Minister hian Silchar-a Transport department hmunhma te a enfiah a, Zangena Petrol Pump thin Mizoram sawrkarin a lak tak chu sawrkar leh mipuite tana chhenfakawm lehzuala cheibawl dan turte department hotute nen an sawi a. Pu John Rotluangliana chuan Aizawl leh Silchar inkara MST bus service thin chu a rang thei ang bera chhunzawm leh a ngaih pawimawh thu a sawi.
Minister hian vawiin khan FCI Godown, Rengtekawn te, DCSO, Kolasib office leh District Transport Office te a tlawh a, an mamawh te enpuiin, hmathar lak dan turte a sawipui a ni.
Pu John Rotluangliana hi a zinnaah Pu T.T. Zothansanga, Parliamentary Secretary te, Pu K. Lianzuala, KVI Board Chairman te, Pu Hrangtawna, Transport Secretary te, Pu Rochungnunga, Supply Director te, Pu Vabeiha Hlychho, Tourism Director te, Pu R. Remmawia, Jt. Director, Transport leh official dangten an tawiawm a ni.
