DIRECTORATE OF INFORMATION & PUBLIC RELATIONS, Government of Mizoram, India

Vawin khan Pu John Rotluangliana Minister FCS&CA, Transport, Tourism, bialtu MLA ni bawk chuan IOC Corporate Social Responsibily (CSR) hnuaia cheng nuai 20 senga sak Govt Mamit Higher Secondary School tana Girl's Hostel hawngin school thuneitute hnenah a tul dan anga hman turin a hlan nghal.

Hawnna puala inkhawm Govt Higher Secondary School-a neihah hian Pu John Rotluangliana chuan Indian Oil Corporation hmalakna hnuaia Mamit Higher Seco dary School tana mamawh tak mai Girl's Hostel sak a ni ta chu lawmawm a ti a, a satu IOC te hnenah pawh lawmthu a sawi a ni. Chutihrual erawh chuan a hawnna programme-ah tunhnaia Bairabi buaina avanga an hotute rawn tel thei lo erawh pawi a tih hle thu a sawi a. School thuneitute chu khawdang atanga lokal zirlai ten tha taka zirna an hmachhawn theihna tura anihna tur ang tak leh uluk taka enkawl turin a chah a. Girld Hostel tura duan ni mahse hmeichhia zirlai awm tur an awm loh anih chuan mipa pawh a remchan dan anga awm tir turin a chah bawk a ni.

Bialtu MLA chuan Hostel a awm thatna chungchang sawiin he hmuna thian inchhar te chu damchhunga thiantha in chharna hmun a nih bakah naupang tih tak takna nena beitute tan in lam aia hunbi nei thlapa zirna hmun a ni a, nungchang leh awmdan mawi tinreng zirna hmun a ni a ti, Mamit khawpui pawna awmte he school a kal chhungte bula inthlahrung taka awm ngai te tan a tangkai leh zual hle dawn a ni a ti bawk.

Pu John Rotluangliana chuan ram leilung fate chu kan ngaihtuahna leh rilru te kan tihzauh a ngai ve ta hle a, ramri chungchang buaina emaw engemaw thil dangah pawh buaina nei thei kan ni a, heng angah te hian a nawlpui maia kan chhehvel a hnamdang a bikin vai te kan haw vek mai hi chu kan in enfiah a ngai a ni a ti, vai tia kan sawi hian India ram hmun hrang hrang leh hnam hrang hrang a tanga lo awmte an ni a, kan buaina nena inkaihnawih miah lo leh Mizoram a hnathawk tam tak te Keralian, Punjabi, Marathi, Jharkhan mi leh sa te leh hnam hrang hrangte pawh an ni ang, tuntum kan buaina ah pawh hian min tan zawktu tam tak an awm avangin kan lam tanga siam thiam an ngai a ni a ti.

Vawiina hawn tak Girl's Hostel hi khum 10 awm theihna tura ruahman a ni a, hawnna hun hi Pu R. Ramtharliana Principal, Govt Mamit HSS chuan a kaihruaia, khawtlang aiawhin Pu P.C Lalthlengliana, Jt VC Chairman pawhin thusawina hun a nei bawk.

Minister hi Education Department hotute leh khawtlang hruaituten an tawiawm a ni.

Attachment