Sub Hqrs  MHIP Mamit Conference Vawi 15- na vawiin khan Siamliana Hall, Mamit-ah hman a ni a. Pu John Rotluangliana, Minister, FCS&CA, Tourism, Transport chuan khuallian niin a hmanpui.

He hun hmanpuitu Pu John Rotluangliana, chuan kan ram leh hnam chawikanna tur leh hmasawnna tur atana pawimawh hmasa ber chu nute an ni a ti a, mizote zingah hmeichhiate'n hma an sawn nasa hle a, mipate zawk hi min chawikan kan ngai hle a. Kan ram leh hnam siamthat nan hian kan inlungrual a, kan inpumkhat a ngai a ni a ti. Chhungkuaah pawh hmeichhiate chu rinkai zawk leh chhawrnaawm zawk an nih thu sawiin eizawnna kawng hrang hrangah mipa tihtur ni-a ngaihah pawh hmeichhia hian tih theih loh an nei tawh lo a ni a ti. Kan sakhuana leh kan Kristiannate ataka kan nunpuina tur kawngah pawh nute an pawimawh hle a. Kan chhungkaw hlamchhiah khawp erawh chuan thil dang buaipui kan nei tur a ni lo a ti bawk. 

Khuallian hian Mamit khawpui tuilakna khawlin duhthu a sam tawk loh avangin Budget tharah PHE Pump tihchangtlun tum a ni a ti a, kawlphetha Bairabi lam atanga chawk luhna turin bul tanna a tan sum pawh pekchhuah tawh a ni a tiin, Mamit District Hospital chu khum 100 awm theihna turin ruahmanna kalpui mek a ni a ti a, JNV school Building sak zawh anih loh avanga harsatna chu women polytechnic Building chu luah hawh rih tura biak mek a ni ti bawk.

Tourism Minister chuan Mizoram chu tourist mite hip tura thuam chhoh mek a ni a, India rama a hmasa ber turin Skywalk siam tura hmalak a ni a, Ropeway KV paradise to Chaltlang siamna tura ruahmanna pawh kalpui a ni a. Hei bakah hian Homestay schemes khaw 7 ah kalpui mek tum a ni a ti bawk.

Vawiin vantlang inkhawm hi Pi Sapliannguri, President MHIP Sub Hqrs Mamit chuan a kaihruai a, member boral mi 53 sunna hun hman niin kum 10 chhung a zawna MHIP hruaitu District chhung khaw hrang hrang a mite chawimawina neih a ni bawk a, Pu Jocob Lalawmpuia Addl D.C Mamit pawhin thusawina a nei bawk.

Sub Hqrs MHIP Conference Vawi 15 naah hian kum 2018-2020 atan thupui siamin thupui atan Faina leh thianghlimna tih chu hman a ni dawn a. Conference hi ni 15th March Ningani atanga tan niin zanin hian a tiak ang. District chhung khaw hrang hrang atangin palai thahnem takin conference hi an hmang a ni. Kum 2018-2020 chhunga hruaitu tur thlanna neih nghal a ni bawk.