Vawiin khan Pu John Rotluangliana, Minister, Food & Civil Supply, Transport, Tourism Bialtu MLA chuan Mamit District Urban Development Office (DUDO) chu a hawng. 

Pu John Rotluanglian Bialtu MLA chuan faina kawnga hma kan sawn leh zual theihnan leh in leh lo dinna kawngahte leh  kawngpui fai zawk  kan neih theihnan a Urban Development Office Mamit District tana hawn a nita chu thil chhinchhiah tlak leh lawmawm tak a ni a ti a, UD&PA Department chuan mipuite in leh lo an din theihnan Bank Loan a puk sak dawn a, chutah chuan mipuite pawhin tihtur kan nei ve a ahmanna tur dik taka hmanga Loan rul tha turin kan inzirtir a pawimawh hle a ni a ti, khawpui tichangtlungtu Department an nih angin tun hun chauh thlir lova nakin zela khawpui hmasawnna tur thlir a packing chungchangah te  khawtlang hruaitute nen ruahmanna felfai tak lo siam turin kalkhawmte  a  ngen a ni. 

Pi Lalbiaksangi District Bawrhsap pawhin thu sawiin Mamit District tena kan mamawh em em  Department kan nei chu lawmawm a tih thu a sawi a,he Department lo awm theihna tura hmalak saktu sawrkar chungah District aiawhin lawmthu a sawi bawk a ni. DUDO Office kan neih loh avanga  Central atanga tanpuina lokal tur tam takah harsatna a awm thin a,  tunah chuan heng harsatna te tihkiana a awm tawh dawn avangin Mamit District mipui te tan chuan  a lawmawm takzet a ni a ti. 

Pu HVL Zarzoenga Jt Director (P) UD & PA chuan technical report pe-in Mamit District atana DUDO  Office  hawn tak hi Rs 9.6 lakh senga din a ni a, UD&PA Department kaltlang hian mipuite hamthatna hrang hrangte in leh lo din turte tan ngaihven theih a ni a, he office hawn a nih hma hian miharsa zawkte insak tanpuina In pakhatah 1.9 lakh sengin In 150 lai sak sak an ni tawh a, Prandhan Mantri Awas Yojana (PMAY) hnuaiah Beneficiary led Construction (BLC) hnuaiah Department in Rs  150,000  tumsakin in neitu Rs 50000/- tum ve in in sak tanpuina dil theih  ni. Hei bakah hian Credit Linked Subsidy Scheme (CLSS) hnuaiah Bank Loan Rs 600000 ( nuai ruk ) thleng dil theih niin Department chuan Loan interest 6.5% thleng a tum sak thei bawk a ni. Atal Mission for Rejuvenation and Urban Transformation (AMRUT) hnuaiah Mamit leh Zawlnuam  khuate chu chei thar tura ruahmanna siam mek  a nih thu a sawi . Kan State khawpui ber Aizawl pawh Smart City ni tura hmalak tum mek zel a ni bawk. 

District Urban Development  Office hawnna hun hi Pu HD Lalpekmawia, DUDO Mamit chuan kaihruaiin Pu H. Lianzela Addl D.C Mamit chuan lawmthusawina a nei a, Mamit khawpui chhunga Heads of Offices, Tlawmngai Pawl hrang hrang hruaitu, Khawtlang hruaitute leh thuthar thehdarhtute an tel a ni.