April Ni 3 - 5 inkara Rawpuichhip Community Hall-a Sub-Hqrs YMA Conference vawi 6-na hman mekah vawiin khan Pu John Rotluangliana, Minister, FCS&CA, Tourism, Transport chuan khuallian niin a hmanpui.

He hun hmanpuitu Pu John Rotluangliana chuan Conference palai zawng zawngte chibai a buk a. YMA thupui 'Ram leh hnam humhalh' chu a taka nunpuitu ni tur chuan taihmakna, rinawmna, thawhrimna kan mamawh a ni a ti. Thalaite'n kan hawiher leh nunphung kan thlak danglam ngam a tul tawh a, kan chhungkaw tan theuh eng nge ka tih ve theih tih inzawt turin a chah a. Tun dinhmuna kan rama HIV hrikpai tamzia sawiin thalai kalkhawmte chu mipat hmeichhiatna kawnga fimkhur turin a chah bawk.

Social Media-in kan hnam min tichhe mek a. Thil hre hmasa nih kan duhluatna te hi hlawkna a awm lova, tawngkam kan duhtui lo thin leh social media kaltlanga indeusawh kan ching thin chu sim a hun tawh a ni a ti a. Tourism a thang chho zel angin kan rilru pawh kan tihzau ve a tul a, Tourist chi hrang hrang, hnam hrang hrang, sap Tourist, Vai Tourist leh local Tourist kan nei zel dawn a, hemi atan hian kan rilru puthmang kan tihzauh a, hawihhawmna rilru kan put a ngai a ni a ti.

Khuallian chuan ram leh hnam humhalh hi vai huat ringawt hi a ni lova, nationalism chu keimahni hnam kan chawisan hi a ni a ti. Ram leh hnam humhalhna turin thalaite a bik takin mipa kan tan lehzual a ngai a. Kan nulate tan pasala neih tlak kan ni em tih inzawt turin a chah a. Zirna kawnga tan la tura chahin tunah hian Mizo tlangval ngei kan ram Chief Secretary tur an van tan tawh avangin thalaite chu Central lamah UPSC leh Staff Selection Commission (SSC) ah te tan la thar turin a chah a. Zirlai ni tawh kher lo te  pawh thawh hreh neilo thalai nih tum turin a chah bawk.

Thinlung thianghlim, tan bik neilo a YMA nih a ngai a. Chu chu YMA mawina a ni a ti a. Kan hnam kalzelna turin thalaite kan pawimawh a,  ngaithla liam mai mai lovin eng nge ka tih theih tih ngaihtuah turin thalaite a fuih a ni.

Pu Lalnunsanga Khawlhring, DFO Mamit Division chuan Mizote leh Environment tih thupui hmangin thing leh mau leh nungchate humhalhna Awareness Campaign a nei bawk.

Conference-ah hian Mamit Sub Hqrs YMA hruaitu thlanna neih niin heng mite hi hruaitu thlanchhuahte an ni.

President : K.Eley Rosanga

Vice President : K.Lalthanzama 

Secretary : Vanlalchhuanga Chhangte

Asst.Secy : H.Lalnunfela

Treasurer : Lalropuia

Fin.Secy : H.Darhmingliana 

Vawiin Programme hi Pu K.Eley Rosanga'n kaihruaiin Pu Lalhuma, SEC in YMA thuthlung sawirualpuina hun a nei bawk. 

Mamit Sub-Hqrs YMA Conference hmang tur hian palai riak lut mi 465 leh langa chhimtu mi 235 an vaiin mi 700 niin zanin hian a tiak ang.

 

Attachment

  • Loading attachment...