Vawiin khan MZP Hqrs buatsaihin Mamit khawpui chhunga Zirlai titha chawimawina Chhimveng YMA Hall, Mamit-ah neih a ni a, Pu John Rotluangliana Minister, Bialtu MLA ni bawk chu khuallian niin zirlai titha te chawimawina a nei. Pi Lalbiaksangi District Bawrhsap chuan khualzahawm niin a hmanpui bawk.

Khuallian Pu John Rotluangliana chuan zirlai pass tharte chu a lawmpui takzet thu sawiin an kal leh zelna turah pawh theihtawp chhuah zel a, Mamit khawpui tihmingthatu ni zel tura chahin duhsakna a hlan a, Zirlaite chu chhawrtlak leh rinawm taka an zirlaite zir thin turin a chah bawk a ni.

Supply Minister chuan buhfai chungchang sawiin kan ram mipui te chu buhfai a thlaphanna tur a awm lo a ti a, a tul tawk ang te-a sem thin a nih thu a sawi, tunah hian Central atangin September thla thlengin kan Mizoram ta tur advance in min phalsak tawh a ni a ti, Rel lian chi ( Broad quage) chu tunah hian Bairabi a thlen thei tawh avangin Buhfai phur Rel hian vawikhat phurah pawh tam tak a rawn thlen thei tawh avangin buhfai-a thlaphanna tur a awm loh thu a sawi bawk.

Transport Minister chuan Mamit mipuite chu kawng chhe lutuk karah phunnawi lova dawhthei taka an awm chu fakin nakin lawkah kawngpui tha in neihna tur ala ni dawn a ni a ti bawk, tunah hian Rawpuichhip Bypass chu peihfela hawn a nih thuai tur thu a sawi bawk a ni. A hminga bialtu a nih avangin kawngtha mamawh bertu a nih thu a tarlang bawk a ni.

Zirlai tha taka pass thar Mamit MZP in a chawimawi te hi HSLC Distinction mi 13 leh HSSLC Distiction leh First Division ah mi 45 an ni a, chawimawi tak zirlaite chu hlawhtlinna hi bul tan nan hmangin duhtawk mai lova, a thiam fal leh chhawr tlak ni ngei tura zir zel turin zirlai kalkhawmte a fuih a, Lehkha thiam mai bakah awm dan mawi, hawihawmna leh rinawmna nei turin a chah bawk a ni.

Mizoram tan enge ka thawh ve theih ang tia ngaihtuahna hman a hun tawh tih sawiin an zirlai bakah thil danga an khawhawi ti zau thin turin a chah a ni.

Khuallian chuan tunlaia kan buaipui Yoga chungchangah ngun tak leh uluk taka ngaihtuaha kan kristianna nen a in mil leh mil lohte chhut turin kalkhawmte hi a chah bawk. Zirlai te chu tawng dang a bik takin Hindi tawng leh Saptawng thiam tel tura chahin, chu chuan kan ram India ram khawi hmunah pawh awm ila min pui dawn a ni a ti.

Zirlai titha chawimawina neih zawh hian Minister Pu John Rotluangliana hian Govt Higher Secondary School Mamit Girls’s Hostel, Multi Sectoral Development Programme (MSDP) hnuai a, Rs nuai 40 senga sak chu a hawng nghal bawk a ni. He hunah hian Minister chuan inthlahrung taka awm ngai lova, Hostel mumal tak Warden hnuai a, disipline thatak nena enkawl theih tur hmeichhe hostel hawn a ni ta chu lawmawm hle a ni a ti. Zirna hlawhtlinna tur atan hetianga inenkawlna tha tak hnuai Hostel neih hi kan mamawh takzet a ni a ti, An zirlai bakah novel leh lehkha bu dang chhiar tam turin zirlai te chu a hrilh. BA leh MA satliah ni mai lovin lehkha thiam chhawr tlak taima leh rinawm ni turin naupangte a chah bawk.

Minister chuan tunlai a social media hman dan chungchangah thangtharte fimkhur tura chahin, a tangkai zawng nilo, midang ti phawk lek leh tibuai zawnga thuchhuah lo turin a chah a ni.

Khualzahawm District Bawrhsap Pi Lalbiaksangi pawhin thusawiin zirlaite chu tum ruhna leh UPSC lama, hlawhtlin tum turin a chah a ni. Zirlai titha chawimawina hi Christopher Lalmuankima, Mamit MZP Vice President in a kaihruai a, MZP Hqrs Mamit President Pu Lalropuia leh MZP General Hqrs atangin Pu B. Vanlaltana ten thusawiina an nei bawk. Govt Higher Secondary Girls Hostel hawnna hi Pu Micky Lalenkawla DPC (SSA) in a kaihruai bawk a ni.

Minister Pu John Rotluangliana hi a nimin khan Mamit lo thlengin a bialchhung hmun hrang hrangah hun a hmang a, vawiin tlai hian Damdiai khua tlawhin khawtlang hruaitute a kawm ang.