572/2022-2023
Aizawl, 21st May, 2022 : Supply Minister Pu K. Lalrinliana chuan vawiin chawhma dar 9:00 khan NABARD Warehousing Scheme (NWS) 2013-2014 kaltlanga cheng nuai 151 senga sak Khawbung Supply Godown leh staff quarters a hawng.
Hawnna inkhawm Supply Kudam tuala neihah thusawiin khuallian Pu K. Lalrinliana chuan kudam a that loh chuan buhfai chhia a tam thin a, a dawngtu turten an dawn kim loh bakah sawrkarin sum tam tak a seng thlawn thin a, hetiang a nih avang hian Mizoram sawrkar chuan kudam tha leh him neih hi a ngai pawimawh a, kawng hrang hranga hmalak dan dap niin sak that hmasak tur zingah Khawbung Supply kudam hi a tel a, sak that a nih theih nana thahnemngai taka hmalatu bialtu MLA Pu Ramthanmawia a fakawm takzet a ni, a ti a. Mizoram pawn atanga buhfai lakluh leh sem darh hian kaihhnawih a ngah em em a, tun thlenga harsatna lian tawk lova kan la kal thei hi Pathian zahngaihna vang a ni, a ti.
Minister hian Khawbung Supply kudam chu buhfai quintal 3000 (300 MT) dah theihna turin a tul anga zauh leh tur a nih thu a sawi a, Mizoramin buhfai kan lei kan dahkhawl zingah kan thar chhuah pakhatmah hmuh tur a awm lo hi tan kan lak a tul tih lantirtu a ni a, intodelh turin rilru kan siam a tul takzet a ni, a ti.
Khawbung Supply Kudam chu mipuite ta a ni tih sawiin Minister chuan khawtlangin enkawlpuia, dimdawi tak leh tangkai taka chhawr tura duhsakna hlanin DCSO leh Storekeeper te nen inlungrual taka thawkho zel turin a chah bawk a ni.
Khualzahawm, bialtu MLA ni bawk Pu Ramthanmawia pawhin thu sawiin a bial chhungah a hmasa atan Khawbung leh Khuangleng kudam sak hna thawh a ni, a ti a. Khawbung kudam tha tak enkawl nuam tur kan nei hi a lawmawm a ni, a ti. Tunhma chuan kudam hi a chung leh bang rangva a ni a, buhfaite hnawng leh ruah lakah a him lovang tih hlauthawng reng renga kan awm thin kha tunah chuan a ngai tawh dawn lova, a lawmawm em em a ni, a ti.
Khawbung Supply Godown hi a dung feet 35.6, a vang feet 27 a ni a, buhfai quintal 2000 (200 MT) dah theihna a ni. Kudam chhuatah hian boulder phah chhuak vekin a chungah rcc slab inches 6 a chhahin an chhung leh a ni. Hnawng leh tui huhin buhfai a tihchhiat loh nan kudam bangah hian brick feet 1 a chhah rem a ni a, uluk taka plaster a ni bawk.
Staff quarters hi chhawng hniha sak niin a pahnih hi a dung feet 26, a vang feet 24 ve ve an ni a. A chung zawk hi chowkidar quarters tura ruahman niin, a hnuai zawk hi storekeeper quarters tura ruahman a ni.
Heng bakah hian kudam dawrtute tan inthiarna siam a ni a, tuihawk luankawr tha tak siam ni bawkin, kudam tualzawl hi cement hmanga plaster chhuah vek a ni bawk.
Kudam leh Staff quarters etc. sak hna hi Babie Construction & Consultancy Services (BCCS), Khatla, Aizawl ten an thawk a, November ni 20, 2020 khan sa tanin February ni 25, 2022 khan an sa zo a ni.
Khawbung Supply Centre hnuaiah hian Ration Card 947 awmin mihring 4231 in an awm a. Ration Card hrang hrang dinhmun chu hetiang hi a ni :
AAY - 130 (mihring 351)
PHH - 588 (mihring 2834)
Non NFSA - 229 (mihring 1046)
Khawbung Supply Centre hian thla tin buhfai quintal 270.68 (AAY - 45.50 qtls, PHH - 141.50 qtls, Non NFSA - 83.68 qtls) a mamawh a, PMGKAY hnuaiah thla tin buhfai quintal 159.10 (AAY - 17.60 qtls, PHH - 141.50 qtls) a mamawh bawk a ni.
Khawbung Supply Centre hnuaiah hian buhfai pek chhuahna Fair Price Shop 5 awmin Khawbungah leh Khuangthingah Fair Price Shop pahnih ve ve a awm a, Zawlseiah Fair Price Shop pakhat a awm bawk a ni.
Vawiin programme hi Pu K. Lalrohlua, Joint Secretary, FCS&CA in a kaihruai a, building leh kudam satu Babie Construction & Consultancy Services (BCCS) ten technical report an pek hnuah Pu K. Zorammuana, Under Secretary, FCS&CA hnenah an hlan chhawng nghal a, AAY beneficiary aiawhin sawrkar chungah lawmthu sawina hun a hmang a, Pu CC Sakhawliana, DCSO, Champhai in lawmthu sawina hun hmangin hnu a khar a ni.
Attachment
- Loading attachment...
