No.3440/2021-2022
Aizawl, 17th December, 2021 : Vawiin khan Mizoram Consumers’ Union Headquarters chuan an Annual General Meeting vawi 24-na chu Horticulture Conference Hall, Aizawlah an hmang a. Food Civil Supplies and Consumer Affairs Minister Pu K Lalrinliana chu khuallian a ni.

Pu K Lalrinliana chuan MCU palaite chibai bukin FCS&CA leh MCU chu thukhat vuaa kal a, mipuiin hamthatna an chan theihna turin danin a phal chinah huaisen takin, inthuruala kal zel turin a fuih a. Petrol, diesel, khawnvartui, buhfai, LPG leh thil dang dangah pawlh dal, hralh ruk,tihchingpen, buk tling lo leh consumer ten dikna chanvo an hloh theihna tur reng rengah a nihna tak chhuihchhuak a, an tihsual chhunzawm lohna turin hmalak a tul a. Consumer te dikna humhimtu FCS&CA Department a awm tih hre thar leh turin mipuite a chah a, lungawilohna nei chuan Legal Metrology ah complain thehluh theih a ni, a ti. Minister chuan Legal Metrology tihchangtlun nan hma an la zel tih sawiin hmanrua pawh lakkhawm zel a ni a, District thar pathumah office din tum niin Hnahthialah office sak zawh a ni tawh a, Khawzawl leh Saituala office sakna tur sum pawh an neih tawh thu a sawi. Consumer Protection Act, 2019 chu Mizo tawng ngeia lehlin a nih thu leh consumer ten an dikna chanvo an hriat tlan a, an dikna rahbeh a nihin engtia hma lak zel tur nge tih an hriat theih nan he Dan thar hi mipui ten kan chhiar tam a tul a ni, a ti a. Mipuiten an chanvo dik tak an chan theih nan Department leh MCU te hian mipui hrilhhriat leh zirtir kawngah tan lak leh zual a tul a ni, Minister Pu K Lalrinliana chuan a ti bawk.

MCU hian District thar pathumah kumin kum tir khan Sub Headquarters an din a. Saitualah February 27-ah, Khawzawl leh Hnahthial District ah te March ni 5 khan Sub Headquarters din a ni. Secretary report-a a lan danin MCU Headquarters leh DCSO Aizawl East, FCS&CA Department tangkawp chuan Consumer Awareness Programme Tlungvel

leh Samlukhaiah an buatsaih a. World Consumer Rights Day 2021 hman niin SEBI Investor Awareness Workshop chu 2020-2021 chhungin tum ruk (6) neih a ni bawk. Consumer Chhantu Magazine tihnun thar leh a ni a. DDK, AIR leh cable tv ah te tum engemaw zat program an nei bawk.

MCU Annual General Meeting hi session hniha then a ni a. Chawhma inkhawm hi an President Prof. Chawngsailova’n a kaihruai a. FCS&CA Secretary Pu Zothanmawia leh Director Pi Ramdinliani ten thu an sawi. Chawhnuah hruaitu thar thlanna leh rorel inkhawm neiin Mizorama Consumers te hamthatna tur rawtna hrang hrang agenda pakua sawiho a ni a. Mizoram District tin atangin MCU palaite he hun hmang tur hian an kalkhawm a ni.