No.3439/2021-2022
Aizawl, 17th December, 2021 : Tukin dar 3:15 vela Aizawl Bawrhsap Pisapui a kan avanga Bawrhsap Pisa atana lo luah lailawk tura ruahman Mizoram Legislative Assembly ram chhunga mi Old MLA Hostel Building, Khatla chu vawiin chawhma khan Assembly Speaker Pu Lalrinliana Sailo hovin endik a ni.

Speaker Pu Lalrinliana Sailo chuan Aizawl Bawrhsap Pisapui kang chu a pawi a tih thu leh Zoram tana rohlu tak a kang fai chu channa nasa tak a nih thu a sawi a. Pisa atana hman lailawk tura Old MLA Hostel an nei remchang chu vanneihthlak a tih thu sawiin, hun engemawchen chu an luah a ngai maithei a, sawrkar pisa zingah chuan mipuiten an dawr tam berte zinga mi a nih avangin a hma thei ang bera pisa an hawn theihna kawnga theihtawp chhuah tlan a tul thu a sawi a ni.

Old MLA Hostel building hi chhawng thuma sang a ni a, room 14 (VIP room 2, ordinary room 12), Dining Hall leh Lounge pakhat ve ve a awm a, hengte hi a tul anga siamrem a cheibawl tur a ni. CCC atana sawrkarin a puan lai mek a nih avangin de-notify a ngai dawn bawk a, DC office atana cheibawl turin sawrkar department hrang hrangin tha an thawh dawn a ni.

Old MLA Hostel building enhonaah hian Assembly Secretariat Commissioner & Secretary bakah Officer engemaw zatin an tel a, DC Office leh GAD bakah PWD, H&FW leh ICT atangin officer pawimawh tak tak te an tel bawk a ni