No.6480/2020-2021

Kolasib 9th November 2020: Vawiin chawhnu khan DC Conference Hall, Kolasib district-ah Kolasib District Parking House Committee-te chuan a vawikhatna atan thutkhawmna neiin Kolasib khaw chhunga motor 300 inhun theihna turin Parking House Support Scheme kalpui dan tur an rel.

Pu K.Lalrinliana, Minister of State, Food, Civil Supplies & Consumer Affairs Department chuan Kolasib khua than zelna kawnga harsatna a awm loh nan motor hunna tur mumal tak a kalpui a tul zia sawiin Traffic tawt avanga harsatna a awm lohna tura lo inhmakhua lawk a pawimawh thu a sawi a. UD&PA hnuaia PAHOSS chu tangkai tak a chhawr a nih theih nan Parking House sakna tur a tanpuina dawng thei tur thlanchhuahna chu uluk tak a kalpui turin Parking House committee chu a chah a ni.

Pu Gaston Vanlalhriatpuia, District Urban Development Officer, Kolasib District chuan Parking House Support Scheme (PAHOSS) kalpui dan tlangpui powerpoint presentation hmangin sawi fiahna hun a hmang a, a tum khatna atan Kolasib khaw chhungah motor 300 hun theihna turin he Scheme hi kalpui tum a nih thu a sawi bawk a ni.

Vawiin thutkhawmna chuan PAHOSS dilna thehluh hun chhung chu November ni 16, 2020 atanga January ni 15, 2021 thleng a ruat a, dilna luh dan a zirin a hmunhma endik tur a ruat ten endik hna an kalpui nghal zel dawn a ni. Dil tur te chuan lirthei ke li nei 5 emaw lirthei ke hnih nei 30 tal hun theihna hmun an nei tur a ni a, lirthei hun nan kum 10 tal hman tur a ni dawn a ni. PAHOSS hnuaiah hian lirthei ke li nei pakhat emaw ke hnih nei 6 hun theihna hmun sak nan cheng nuai 1 zel tanpuina pek a ni ang a, lirthei hun man (Parking fee) hi a in neituten an chang vek dawn bawk a ni.