FCS&CA Minister Pu K.Lalrinliana chuan Kolasib Officers’ Club buatsaih Career Awareness Campaign hawnna chu vawiin khan khuallin niin a hmanpui.

Khuallian chuan Kolasib Officers’ Club ten zirlai te hmakhua ngaia hmalakna thatak an nei chu thil lawmawm tak ani tiin zirlai te tan thil hlu tak leh chhinchhiah tlak tak ani a ti.

Pu K.Lalrinliana chuan zirlai kalkhawm te fuihin ‘Ram tan enge kan tih theih ang, Intodelh tumna kawngah engtin nge ka zirlai ka nunpui theih ang’ tih te hi mahni inzawt nawn fo turin a chah a, awmze neia zirna kawng zawhin Ram leh Hnam intodelh kan nih theihnan ngaituahna seng thin turin zirlai kalkhawm te chu a chah bawk a ni. Zirlai nun ah chuan Pathian dah pawimawh hmasa berin thawhrimna/taihmakna leh awmze neia zirna kawng zawh in a zui a ngai ani tiin mithiam hmasa te leh kan Pi leh Pu ten an lo hmuchhuah tawh chu tunlai khawvela kan mamawh dana zira lo her remin hlawk zawka kan hman tangkai angai ani a ti. Ram leh Hnam intodelhna kawnga zirlai hman tangkai a pawimawh thu sawiin Ram ngaw, tui hna leh nungcha te humhalh zawnga tan kan lak a hun tawh a intodelhna rilru pu in thil chi hrang hrang dehchhuah/tharchhuah na kawngah hma kan sawn a hun a ni ati.

Kolasib District thalaite chuan District dang thalaite angin theihna an nei ve ani tih hria a, mahni zirlai chu nunpui a pawimawh ani a ti a, mahni inringtawk takin huaisenna nen lehkha zir a ngai ani a ti. kan Ram in enge a mamawh, Ram tan enge ka thawhchhuah ve theih ang tih ngaituahna te sengin Mizoram tana mi tangkai nih tum in a tha zawnga intlansiak turin zirlai kalkhawm te chu a fuih a ni.

Khualzahawm Kolasib Bawrhsap Pu Zoengsanga chuan khawtlang nun hrisel, nuam leh felfai ni tur chuan a bulthut atanga zirna mumal leh awmze nei kalpui a pawimawh ani tiin Kolasib District huam chhunga zirlai naupang ten zirna kawnga hma an sawn theihnan zirlai nu leh pa, zirtirtu bakah khawtlang hruaitute thawhona a pawimawh hle ani a ti. Zirtirtu ten mawhphurna sang tak an nei ani tiin mahni zirlai naupang te chu eng ang mize pu nge an nih, an chakna lai leh chak lohna lai te, an tui zawngte zir/zawh peih a ngai ani tiin kan zirlai naupang te chu mi puitling mi hmantlak ah kan chher chhuak tur ani a ti a, Nu leh Pa te leh khawtlang hruaitute pawhin zirlai naupangte chu khawtlang thil tih na a tel tir tamlo a, zirna a tan hun thawl pek thiam a ngaih thu sawiin nu leh pa ten kan fate zirna kawngah kan tuipuia kan telpui a ngai ani a ti.

Career Awareness Campaign ah hian line hrang hrang zawh duh tana hriattur pawimawh te sawiho na hun hman ani a, Pi Lalrinpuii, MJS, Civil Judge, Maj.(Rtd) Carolyne Z.Pachuau DSWRO, Pu Gaston Vanlalhriatpuia, MCS, BDO Thingdawl leh Pu C.Lalmalsawma, MPS, SDPO Kolasib ten zirlai kalkhawm te hnenah career chungchanga hriattur pawimawh hrang hrang sawina hun an hmang a ni.