3192/2022-2023

Kolasib dated 7th January 2022: Vawiin khan Hmar veng, Kolasibah North Kolasib Games & Sports Association Semi Indoor Basketball Court, Gallery leh Volleyball Court hawnna hun chu Minister Pu K.Lalrinliana'n khuallian niin a hmanpui a. Pu John LT Sanga, Deputy Commissioner chu khual zahawm niin Pu Laldinpuia, President, NKGSA chuan hun a kaihruai a ni.

Minister Pu K.Lalrinliana, Kolasib Assembly Constituency bialtu MLA chuan Hmar veng field a infiamna hrang hrang khelhna a awm theih nan ruahmanna siam țhin a nih dan te tarlangin tun ah a hlawhtlinna hmuh chhoh mek zel a ni chu lawmawm a tih thu a sawi a. Hmar veng NKGSA hruaitute leh khawtlang hruaitute fakawm a tih thu sawiin heng infiamna hmunhma te hi neitu nihna puchung a uluk leh țangkai tak a hmang turin a chah. Minister chuan Kolasib khaw chhungah khelmual țha leh changtlung tak tak a awm thu sawiin heng hmunhma te hi Kolasib țhalaiten an thiamna leh theihna an tihpunna hmun a hmang turin a chah a. Kolasib khaw chhung hmun engemaw zah ah Futsal ground siam tur a ruahmanna a awm thu leh Semi indoor Volleyball court sakna turin hmalak thuai a nih tur thu a sawi. Khawtlang hmasawn tur chuan a chhung a cheng te an hrisel hmasak a pawimawh thu Pu K.Lalrinliana chuan sawiin infiamna chu taksa tihrisel tu leh nun vawngtu hmanraw pawimawh tak a nih angin infiamna chu uar zel turin kalkhawmte a chah bawk a ni.
Pu John LT Sanga, Deputy Commissioner chuan Kolasib țhalai ten infiamna hrang hrangah din chhuahpui tham theihna an neih thu tarlangin heng theihna te hi eizawnna tlak, ram leh hnam tihmingțhatu ah hmang turin a chah.

Pu Lalnunsanga, Marvin's Construction tarlan danin April ni 17, 2022 khan Semi Indoor Basketball court hi sak țan a ni a. Feet 101 a sei, feet 61 a zau leh a chung feet 25 a sang niin Cheng Nuai 46 vel seng a sak a ni. Semi Indoor Basketball court hawnna ah hian Pu C.Lalengkima, Secretary, NKGSA in report a pe a, Pu Laltlankima, President, Village Council, Hmar veng in thu sawiin Pu F.Zothankima, Vice President, NKGSA in lawmthu sawina hun a hmang a. Kolasib distrcit atanga North East Olympic 2022 a lawmman la te chawimawina hun hman a ni bawk a ni.

Attachment

  • Loading attachment...