2396/2022-2023

Kolasib, the 21st October, 2022: Vawiin chawhma khan I&PR Conference hall, Kolasibah Kolasib Writers Club buatsaihin annual magazine tlangzarhna hun hman a ni a. Minister Pu K.Lalrinliana chu khuallian niin Pu Thomas D.Lalengliana, President, Sub Headquarters, YMA Kolasib chu uaptu niin a telpui bawk a ni.

Minister Pu K Lalrinliana chuan hmanlai atang tawh a thu ngaihnawm, thu ril leh thil pawimawh tak tak ziakmiten ziak a dahthat nachang an lo hriat avangin tun thlengin hun kal tawh chanchin pawimawh tak tak kan zirin kan hriat phah theih thu a sawi a. Hun kal tawh atanga zirtirna pawimawh tak tak te chuan hmalam hun eng zawk a thlen phah thin thu a sawi. Ziak a thil dahthat, enlet tur awm thin chuan tul lo a inhnial buaina te a pumpelh phah tir thin thu te, ngaihtuahna leh ruahmanna thar a pian chhuah tir theih dan te Pu K.Lalrinliana chuan sawiin ziakmite chu kan ram leh hnam ro hlu vawng thatu pawimawh tak an nih thu a sawi bawk a ni.

Pu Thomas D.Lalengliana chuan lehkha chhiar tam leh ziah tam chu rilru chher hriamna hmanraw pawimawh tak a nih thu sawiin, chhuan lo la awm leh zel tur tan a thu tha tak tak ziak a hnutchhiahtu nih chu ropui a tih thu a sawi a. Kolasib Writers Club kaltlanga Kolasib district chhunga ziakmite tih hmasawn hna thawk zel turin duhsakna a hlan bawk a ni.

Pu Thanglura Ralte, President, Kolasib Writers Club chuan kalkhawmte lawmna thu sawiin Pu R.Lallawmsanga, Secretary-in Kolasib Writers Club chanchin tlangpui tarlanna hun a hmang a. Pu Laldinsanga Sailo chuan 'Parfung' lehkhabu thlirlawkna neiin Pu Ebenezer Lalchhanhima, Asst. Secretary chuan lawmthu sawina hun a nei bawk a ni.

Kolasib Writers Club Annual Magazine 'Parfung' hi phek 222 a chhah niin ziaktu 23 te thuziah a tel a ni. Annual Magazine tlangzarhnaah hian Pu Zairemchhunga, Bahzar Editor hnenah 'TS Luaia Award' hlan a ni a. Annual Magazine tlangzarhnaah hian Kolasib khaw chhunga NGO leh khawtlang hruaitute, Govt. Kolasib College, Mizo Department, Kolasib Welfare Association, Aizawl te leh Gorkha Youth Association hruaitute an tel a ni.