2397/2022-2023
Aizawl, the 21st October, 2022: Mizoram Board of School Education(MBSE) chuan India rama exam ngaihsan hlawh leh harsa ber pawla chhal ngam, Joint Entrance Examination (JEE)-Advanced-a inziaktling Mizo naupang 5: Simon Lalremsiama Shangpliang, St. Paul’s HSS, Gabriel Vanlalbera, St. Paul’s HSS, Lalchhanhima, St. Paul’s HSS, Vanlalmuanpuia, St. Paul’s HSS leh Malsawmzuala Khiangte, National Public School, Guwahati-te hnenah lawmpuina an hlan.

Heng naupangte hi St. Pauls HSS atanga HSLC lo pass chhuak tawh vek an ni. JEE Exam hi JEE-Mains leh JEE-Advanced-ahte then a ni a, JEE-Advanced hi India rama engineering college tha bera sawi, Indian Institute of Technology (IIT)-a luh theihna tura entrance exam a ni.

MBSE hotute chuan tun tuma Mizo zirlaite hlawhtlinnaah MBSE hnuaia zirna in hma a sawn hle tih an sawi a. A hnuaia tarlan ang hian thuchhuah an siam a ni.

"Mizoram zirna hi hniam bik anga ngaih a ni thin a, Mizoram Board of School Education hian National Curriculum Framework – 2005 zulzuia siam syllabus a hmang a, kum 2013 atang phei kha chuan India ram pumah a inanga hman tura NCERT siam, Common Core Syllabus chu hman a lo ni tawh nghe nghe. JEE leh NEET Exam-ah MBSE hnuaia HSLC leh HSSLC pass chhuak mi eng emaw zat an awm leh ta hian MBSE syllabus hi India rama state dangte syllabus aia a that lohna bik a awm reng reng lo a ni tih a tilang chiang hle awm e. Tuna Mizo naupang panga inziak tlingte pawh hian Mizorama zirna huanga hmasawnna awm mek a tilang a tih theih bawk ang".

Vawiina lawmpuina MBSE Office, Chaltlanga neihah hian Pu L. Thangmawia, MLA, Vice-Chairman, Human Resource Develepment Board leh Pu C Lalduhkima, Training & Placement Officer, Higher & Technical Education (Technical Wing) te bakah MBSE officer leh staff te an tel a ni.