No.7580/2020-2021

Tukin zing khan I&PR Conference Hall, Kolasibah Mizoram State Day 34th Anniversary lawmna hun hman a ni a, Pu K.Lalrinliana, Food, Civil Supplies & Consumer Affairs Department Minister chu khuallian niin Dr.H.Lalthlangliana, Deputy Commissioner-in hun a kaihruai a. Kolasib district-a Sawrkar department hrang hrang hotute leh NGO hruaitute an tel a ni.
Minister Pu K.Lalrinliana chuan State puitling dinhmun sual chhuak tur a hmalakna hrang hrangte tarlangin harsatna leh buaina nasa tak karah remna leh muanna a awm theih nan ni 30, June 1986 khan inremna thluthlung ziah niin ni 20, February 1987-ah Mizoram chu State puitling a hlan kai a nih thu a sawi a. State dangte nena khaikhin chuan Mizoram chu State naupang tak angin lang mahse, Khawvel thiamna thang chak tak avangin tumna a awm chuan State dangte rual hian hma kan sawn ve thei a ni, a ti a, State Day cham 34-naah hian intodelh tum kawnga intuaithar a, tan la thar turin kalkhawmte a chah. Minister chuan mamawh hrang hrang phuhrukna kawng ah thenawm State-te a innghah ngai lovin mahni phak tawk theuhah intodelh dan kawng zawh a tul thu a sawi a, kan ram hausaknate tangkai taka hman a nih theih nan thiamna chhawr tlak phur chhuak thei turin hemi kawnga thawktute leh zirlaiten ngaihtuahna an hman tam a, tan an lak a pawimawh thu a sawi. Minister chuan Mizoram leh ram dang inkalpawhna tha a awm theih nan Sawrkar hmalaknate tarlangin hun reiloteah heng hmalaknate hi tihpuitlin beisei a nih thu a sawi a, chumi hun atana lo inhmakhua lawk a, tangkai taka hmangtu ni tura inruahman a tul thu a sawi bawk. 
Minister chuan Kolasib district chu Sangha khawi kawngahte, buh leh thlai thar kawngahte hmunhma rem tak awmna district a nih angin hemi kawnga tan la lehzual a, intodelhna kawnga hma hruaitu ni turin kalkhawmte a chah bawk a ni.
State day lawmnaah hian Kolasib Vengthar YMA branch te zai ngaihthlak niin Pu Lallawmawma, Addl. DC in lawmthu sawina hun a hmang bawk a ni.

Attachment

  • Loading attachment...