1272/2023-2024

Kolasib dated 26th July 2023: Vawiin chawhnu khan NABARD kaltlang a sak Govt. Middle School, Meidum chu Pu K.Lalrinliana, Minister, Food, Civil Supplies & Consumer Affairs Department changtu, Kolasib Assembly Constituency bialtu MLA ni bawk chuan a hawng a. A hawnna hun hi Pi K.Lalremsiami, SDEO, Kolasibin hun kaihruaiin Meidum khawtlang hruaitute leh Meidum School Managing Committee-te he hun ah hian an tel a ni.

Minsiter Pu K.Lalrinliana chuan zirna in chu zirlai naupangte tan a rilru leh ngaihtuahna an tuai hriamna hmun, hmunhma nuam leh zirna tih hmasawn nan pawh a hmun rem tak a nih tur thu sawiin Govt. Middle School, Meidum building thar pawh zirlai naupangte tan a thiamna thar an chharchhuahna hmun ni ngei turin duhsakna a hlan a. School building leh buangrua te chu neitu nihna thinlung puchung a enkawl zel turin khawtlang hruaitute leh thawktute a chah. Khawtlang tih hmasawnna tur a hmanraw pawimawh ber zing ami chu zirna hmang a thiamthil hmantlak neih a nih thu Minister chuan sawiin ram leh hnam tan a mi tangkai ni tum theuh turin kalkhawmte a chah bawk a ni.

Pu Lalrosanga, Chairman, School Managing Committee chuan report pein NABARD hnuai a cheng Nuai 10 leh Samagra Siksha hnuai a minor grant atangin Toilet grant nuai 3.5 hmangin Govt. Middle School hi sak a nih thu te, a dung 76 feet leh a vang 17 feet a nih thu a tarlang a. February ni 9, 2023 a sak tan niin July ni 15, 2023 khan sak zawh a ni a, MLA fund hmangin a hmunhma te laih zawl niin School Managing Committee member leh mi inphal tak takte atangin tanpuina an dawn dan te a tarlang bawk a ni.

Govt. Middle School, Meidum ah hian zirtirtu 6 awmin zirlai 36 an awm mek a ni.