2941/2022-2023

Kolasib dated 5th December 2022: Vawiin chawhma khan Middle School Zonal Sports Southern Zone chu Pu K.Lalrinliana, Minister of State, Food, Civil Supplies & Consumer Affiars Department chuan khuallian niin Diakkawn Field, Kolasibah a hawng.

Middle School Zonal Sports Southern Zone hawnna hunah hian Minister Pu K.Lalrinliana chuan zirna piah lam ah rilru leh taksa hrisel a pawimawh thu sawiin infiamna hmang a taksa sawizawi tam a țul thu a sawi. Infiamna chu țhenrual țha siam nan te, mahni inrintawkna hmanraw țangkai a nih thu leh midangte nen a thawhho zirna hun țangkai a nih thu sawiin Minister chuan infiamna chu Mizo țhalai engemaw zahin eizawn nan an hman tawh thu a sawi a. Kawng engkimah taimakna leh tih tak zetna nen chuan hlawhtlinna a awm țhin thu sawiin Sports hun hlimawm tak hmang turin duhsakna a hlan a ni.

Middle School Zonal Sports Southern Zone hawnna hun hi Pu Lalremliana, Headmaster Govt. Diakkawn Middle School II chuan a kaihhruai a. Pu Benjamin Lalthanzuala Sailo, Secretary chuan technical report a pe. Zonal Sports ah hian infiamna heng, football, Volleyball, Tug of war, running event, dead ball leh shot-put a inelna a awm ang a. Govt. Middle School pali, Private school pahnih, Presbyterian School leh UPS School pakhat ve ve an tel a, December ni 9 thleng a awh dawn a ni.