3309/2022-2023
Kolasib dated 20th January 2022: Tukin khan Pu K.Lalrinliana, Minister, Food, Civil Supplies & Consumer Affairs Department chuan MLA-LADS leh Department hrang hrang kaltlanga Meidum, Pangbalkawn leh Bairabia hmasawnna hnathawh hrang hrangte a hmun ah a endik a. He hun ah hian Pu Ngurthansanga, Managing Director, MAHFED, Pu Vanlalmuana, SDC, Bairabi leh Pu Hmingthanzuala, DIPRO ten an țawiawm.

District Rural Development Office leh MLA-LADS țangkawpa Pangbalkawn Hall sak lai te, Health Department hnuai a Pangbalkawn Health Sub-Centre, Staff Quarters leh MLA-LADS hmang a Pangbalkawn Football field laih mek te Supply Minister chuan tlawhin Sawrkar hmalakna hnuai a hmasawnna ruangam siam te chu mipui ta tur a nih angin uluk tak a vilpui a, neitu nihna thinlung puchung a enkawl țhin turin khawtlang hruaitute a chah. Pu K.Lalrinliana chuan Meidum Football field laih mek a tlawhnaah khawtlang tan a ro tling hmunhma siamna kawng a khawtlang hruaitute inpekna chu fakawm leh entawntlak a tih thu a sawi a, MHIP Building, Meidum sak pumna tur a an mamawh te a ngaihtuah pui tur thu a sawi.

Minister Pu K.Lalrinliana chuan Cheng nuai 274 seng a Dec 2021 a sak, MAHFED Warehouse, Bairabi tlawhin ramri kan a thlai thar chawk luh leh hralh chhuah kawng a hmanraw pawimawh tak a nih a beisei thu a sawi a. Kuthnathawktute tih hmasawnna tur leh eizawnna ngelnghet siam nana țangkai tak a hman a nih theih nan thawktute a fuih bawk a ni.

Pu Ngurthansanga Sailo, Managing Director, MAHFED tarlan danin MAHFED Warehouse sakna sum hi Ministry of Tribal Affairs atanga hmuh niin Chowkidar Quarter, Rest House leh Warehouse sak hna thawh a ni a, November 2022 khan hna hi thawh zawh a ni.