3310/2022-2023
Champhai, the 20th January, 2023: Kumin March thla chawhnu lama Inter District Volleyball Tournament 2023, Champhaia nghah tur buaipui kawnga hma la tura din, Champhai District Organizing Committee on Inter District Volleyball chu vawiin chawhma dar 11 khan an Chairman, Pu James Lalrinchhana, District Bawrhsap hovin DC Conference Hall-ah an thukhawm.

District Bawrhsap Pu James Lalrinchhana chuan hmasawnna tur thil dangte thlauhthla chuang lovin zirna, hriselna leh infiamnate chawisan kawngah Champhai District-ah theihtawp chhuah tum anih thu a sawi a. Ramri depa awm kan nih avangin ruihhlo laka thalaite chhanchhuah nan Sports kaltlanga hmalakna dah pawimawh a ni, a ti a. Sawrkar Department leh mipuite inkarah thawhhona tha leh inpawhtlanna chhawmnun a pawimawh thu pawh sawiin, Inter District Volleyball Tournament thlen tur chu Champhai hmellanna tur anih avangin mawhphurhna hrang hrang neite chu theihtawp chhuah turin a chah a ni.

He hunah hian Champhai District Volleyball Association (CDVA) General Secretary Pu James Lalruatkima Pachuau hnen atangin meeting koh chhan leh agenda sawifiahna ngaihthlak a ni a. Inter District Volleyball Tournament thlen leh buaipui kawnga tul hrang hrangte sawiho niin, peng hrang hranga hmalatu tur Sub-Commitee 9 din niin, member turte ruat an ni.

Tun tum hi Champhaiin Inter District Volleyball Tournament a thlen tum hnihna tur niin, District 11 te tel thei tura beisei an ni a. Kahrawt Field-a Volleyball Court pahnihahte tournament thlen tuma ruahmanna kalpui niin, zan lam thlenga khelh theih tura electric current pek leh tul pawimawh dang chhawpchhuah dan turte pawh sawiho a ni bawk.