3311/2022-2023
Aizawl, 20th January, 2023 : Vawiin khan Social Welfare & Tribal Affairs Department bultumin A.R. Ground-ah Pawl Kut hlim taka hman a ni a, Pawl Kut hawnna programme hi Social Welfare & Tribal Affairs minister Er. Lalrinawma’n Kut Pa niin a hmanpui a, Social Welfare & Tribal Affairs Secretary KT Beicho chu Kut thlengtu a ni.

Pawl Kut hawnna inkhawmah Kut Pa Er. Lalrinawma chuan Zoram mipuite Pawl Kut chibai bukin duhsakna a hlan a, mizo hnam ziarang leh nunphung duhawm tak chawi nung zel turin leh, kan hnam lam leh hlate humhalh a ti thangmawi zel tura theihtawp chhuahtute lawmthu hrilhin duhsakna a hlan a ni. SW&TA department in Art & Culture, Tourism leh School Education department te nen tha taka thawkho a Pawl Kut an buatsaih chu thil lawmawm leh chhinchhiahtlak a ni a ti a. Mizoram sawrkarin zofate inpumkhat zelna tur atan leh kan hnam nun leh ziarang humhalh zelna kawngah theihtawp chhuahin hma a la zel dawn tih sawiin, India ram mai bakah khawvel huapa kan hnam chin dan leh ziarangte phho chhuak zel turin tan a la zel dawn tih a sawi a ni.

Er. Lalrinawma chuan khawvel thang zel leh hmasawnna chak taka kal mek hian kan hnam nun leh ziarang mawi tak kha a pawlh dal tial tial em aw ? tiin a ngaih theih a, kan hnam ziarang leh nunohung kan lo kalpui thin kha a thi mek zel a, thangtharte zingah phei chuan hriat alawi nei mang lo an tam tawhin a rin theih a ni a ti a. Hetiang din hmun kan thlen tawh avang hian a sawia sawi ringawt lova, a tak taka mit ngeia an hmuh a, an vawn chhunzawm theihnan Pawl Kut hlimawm tak hi buatsaih a ni tih sawiin, thangtharten hlawk taka hmang ngei turin duhsakna a hlan a ni.

Pawl Kut hi nihnih chhung awh tura ruahman niin vawiin (zirtawpni) hian Middle School leh High School zirlaite pualin Mizo infiamna leh chheihlam a intihsiakna buatsaih a ni a. Middle School zirlaite mipate tan Sakuhuilut, inarpathai leh tawlailir intlansiak hmanga intihsiakna buatsaih a ni a, hmeichhe tan zawnga leilawn dim dim, ketamine tlan leh invawr hmanga intihsiakna buatsaih a ni.

High school zirlai mipate tan insuknawr, inarpasual leh kalchhet hmanga intihsiakna neih niin hmeichhiate tan ketaminu tlan, kawikah leh tuium khirh tui chawi hmanga intihsiakna neih a ni.

Pawl Kut lawmna inkhawmah hian Kut Thlengtu Pu KT Beicho, Secretary, Social Welfare & Tribal Affairs Department chuan inlawmna thu sawiin, Pi Carol VLMS Dawngkimi, Director, Art & Culture Department in Pawl Kut chungchanga ziak miten an lo ziah dan hrang hrang te sawiin, Pawl Kut chanchin a sawi a, Pi Zodingpuii, Director, Social Welfare & Tribal Affairs Department in lawmthu sawiin Pawl Kut hawnna inkhawm a khar a ni.