Vawiin khan Mizoram Finance & Accounts Service Association (MFASA) chuan Tourist Lodge, Chaltlangah Annual General Conference vawi 23-na an hmang a. He hunah hian Minister of Agriculture, Irrigation & Water Resources, etc Pu K.S. Thanga chu khuallian niin a hman pui a ni.

Minister chuan MFASA member-te chu Mizoram sum vawngtu, mawhphurhna pawimawh tak nei an nih thu leh, an hna an tlin hle a a hriat thu a sawi a. Mipui rawngbawltu an nih angin office-a anmahni rawn dawrtu te pawh tha taka dawngsawng a, tanpui theihna apianga tanpui zel turin a chah a. Sorkar hna thawk emaw eng hna pawh thawk ila, thawktu tha ni tur chuan mahni invawnna, discipline tha tak neih a pawimawh a ni, tiin Minister chuan officer kalkhawmte chu an hna chelh theuh ah invawng tak chungin inpekna tak tak nen thawk thin turin a chah a. Mahni hna kaihhnawih thilah phei chuan kum tam leh tam loh, thawh rei leh reiloh sawi lovin thiamna leh hriatna tipung zel a, in ‘update’ zel turin a chah bawk.

He hun hi Pu Vanlalsawma, MFASA Vice-President chuan kaihruaiin, Pu Thara Lungtau, MFASA Secretary leh Pu V. Lalzamlova, MFASA Finance Secretary-te hnen atangin report ngaihthlak a ni a. He inkhawmah hian MFASA member thar mi 11 lawmluhna hun hman a nih bakah, kumina an member boral ta, Pi Liandingi Chhangte, FAO, H&ME sunna hun an hmang a; Pu Ramchhuana, MFASA President chuan lawmthu sawiin chawhma inkhawm hi a khar a. Chawhnu lamah hian rorel inkhawm neih niin, kum 2017-2018 chhunga an pawl hruaitu turte an thlang nghal a ni.

Mizoram Finance & Accounts Service Association-ah hian member 76 an awm mek a, kum 2016-2017 chhungin an member mi 18 kaisang in, mi pariat superannuation pension-a chhuak an awm a, mi thar 11 an nei bawk. Vawiin MFASA General Conference-ah hian member zaa 90 an kal a ni.