Vawiin khan NEDP bultuma Information and Public Relations Department (I&PR) buatsaih Press Study Tour nei tura lokal MJA General Headquarters member-te chuan Champhai District chhunga sawrkar hmalakna hrang hrangte leh pipute sulhnu pawimawhte tlawh kualin zirchianna an nei.

MJA General Headquarters member-te hian Indo-Myanmar Road siam mekte, Composite Land Custom Station, Department of Trade and Commerce, Zokhawthara mite  tlawhin Indo-Myanmar Trade zirchianna an nei a. Hemi bakah hian pipute sulhnu pawimawh tak Rih Dil an tlawh bawk a ni.

Nimin lamah Khawbung RD Block hnuaia pipu sulhnu pawimawh tak tak Kawtchhuah ropui (Vangchhia); Lianchhiari lunglen tlang (Dungtlang) leh Hla kungpui mual (Khawbung) a mite an tlawh a. Mizorama khaw fai ber a thlan Biate khua pawh an tlawh bawk a ni. Heng an fan kualnaah hian mithiamte leh khawtual mite puihnain zirchianna leh zir hona hun hlawk thlak tak an hmang a ni.

Press study Tour memberte hi Pu C. Lalnunkima, Deputy Director, I&PR in a hruaia, Pu C. Lalhmachhuana, Gen. Secretary, MJA hovin press mite hi an thawkchhuak a ni. Press mite chuan sawrkar hmalaknaa Press Study Tour leh Project Site Visit neih a ni chu hlawkthlak an tiin an kalna hmun apianga khawtlang hruaitute lo dawnsawn danah lawmthu an sawi bawk a ni. Vawiin chawhnu khan Aizawl lam panin an let leh a ni.