Vawiin khan Minister of State leh Mizoram Football Association President ni bawk Pu Lal Thanzara chuan West Phaileng Zone Football Tornament Final khelh hmanpuiin, W. Phaileng Primary Health Centre a tlawh nghal.

Minister chuan tournament kharna inkhawmah hian thu sawiin, player-te chu thianghlim tak leh infiammi nih tling taka inkhel turin a chah a. Football-ah Mizoramin nasa takin hma a sawn thu sawiin, Mizo thalai tam tak India club hrang hrangah khelin, eizawnna ngelnghet an neih zel thu te a tarlang a. India ram chhung mai bakah khawvel huap inelnaahte lawmman an la pha tawh a; Heng hi thangtharte taimakna leh Sorkarin infiamna lamah thahnemngai taka hmunhma changtlung zawk kan neih theih nana a hmalakna vang a ni, Minister chuan a ti a. Inkhelh hi hun khawhralna satliah ni lovin, eizawnna tham a nih tawh thu te, inkhelh mai bakah inkhel endik dan inzirtirna pawh kalpui a nih thu Minister chuan a sawi a ni.

Vawiin West Phaileng GSA Playground a tournament final match khelh ah hian West Phaileng GSA Team A leh Team B intumin, GSA Team A an chak a. Championship Trophy hi Minister hian a hlan nghal a, MFA chuan West Phaileng Games & Sports Association hnenah football leh Assistant Referee Flag a hlan bawk.

Tournament zawh hian Health Minister chuan West Phaileng Primary Health Centre tlawhin thawktute nen inkawmna hun a hmang a. Health Centre-in mamawh hrang hrang an thlen te chu ngaihtuahsak a tum thu a sawi a. Sorkar hnuaia thawk doctor leh staff nurse indaihlohna phuhruk tura doctor, nurse leh health worker lak belh tum a nih thu sawiin Pu Lal Thanzara chuan hriselna kawnga hmalak anih zel thu a sawi a. Thawktute pawhin hmangaihna nen damlote an enkawl thin chu fakin, chhunzawm zel turin a chah bawk.