Vawiin khan Mizoram Legislative Assembly Deputy Speaker Pu R.Lalrinawma chuan Hrangbana College, Golden Hall-ah an college-a kai tharte lawmna inkhawm a hmanpui.

Deputy Speaker chuan sorkar in zirlai te hmasawn nan SSA, RMSA leh RUSA hmangin tan a la a, a hlawhtlinna a lang tan mek a ni, a ti. Hlawhtling tak tak tur chuan tlem te zira pass a tawk lova, taima taka zir a midangte peih chin baka thahnemngaih a ngai a ni, a ti a. Zirlai thenkhat hlawhtling zo ta lo ten chhuanlamah zirtirtu emaw, lehkhabu emaw, hmanrua engemaw puhin thiam inchantir an tum thin a, an hmachhawn ang chiah hmachhawn midang an pass theih chuan anmahni mawhphurhna a ni, a ti. Pu R.Lalrinawma chuan ram changkangte changkanna chhan chu dan an zawm that vang a ni a, keini pawh changkan kan duh chuan dan kan zawm tur a ni a, mob rule hmanga rorel fel tum ai chuan dan ang zela thil tih duhna kan neih tak tak hunah kan ram chuan changkanna lam a zawh tak tak thei ang, a ti bawk.

July 21, 1980 a din Hrangbana College-ah hian zirlai 1722 an awm a, department hrang hrang sawm (10) a awm a ni. An Principal Pu Lal Rinawma kaihhruai college kai tharte lawmna inkhawmah hian khuallian chuan MZU hnuaia degree exam result chhuak hnuhnung bera an college atanga tithate hnenah R.Zatlai Award leh Hrangbana Award te a sem a. Zirlaite tan Water Cooler a pe a. He college atanga zirchhuak Laltlanmawia lehkhabu ziak ‘Kum mak danglam’ tih chu Deputy Speaker hian a tlangzarh nghal bawk a ni.