Vawiin chawhnu khan Health and Family Welfare, I&PR, etc. Minister Pu Lal Thanzara chuan cheng nuai 39 chuang senga Electric Veng thlanmual panna kawng siam chu a hawng.

Minister chuan tlanmual kawng a tlang theih nana ngaihtuahna leh tha sengtute chu khawtlang tana an inpekna chungah fakawm a tih thu a sawi a. An hna a hautak zia ngaihtuahin sum tlem te seng a tha taka kawng siam hna an zo thei chu khawtlang hruaitute leh anmahni puibawmtu engineer leh mi dang dangte chungah lawm thu sawiin, tlamngai pawl hrang hrangten khawtlang hruaitute hnathawh an tawiawmna leh an inhlutsak tawnna chu entawntlak a tih thu a sawi bawk. 

Thlanmual panna kawng siam hna hi kum 2013 khan thawh tan a ni a. A sqk nan hian sum hnar hrang hrang - MLA Fund, MP (LS) Fund, PWD leh Social Welfare Department atang te a hmuh khawm chu cheng nuai 39.5 a tling a. Kawng sei zawng hi metre 110 niin, a zau ber lai ni feet 15, a zim ber lai feet 12 a ni a. Hna thawh chhung hi ni 382 niin, vantlang hnathlawng vawi khat koh a ni bawk. Minister Pu Lal Thanzara chuan ama MLA Fund atangin kawng siamna bakah hian a bul luikawr dawh nen cheng nuai 2 a pe bawk.

Vawiin hunah hian AMC Ward V Councillor Pu Rosiamngheta pawh telin, khawtlang hruaitute leh tlawmngai pawl hrang hrang hruaitute an tel a. Thlanmual panna kawng siam zawh tak hian Electric Veng thlanmual thar tur mipui thawhkhawm hmanga an lei chu a pawh thla thei dawn a. Bialtu MLA chuan a laih tlang na tur sum mamawh a ngaihtuah pui tur thu vawiin hian a tarlang bawk.