Ni 3 awh Thalfavang Kut-2016, Tourism department huaihawt chu vawiin khan Dy. Speaker Pu R Lalrinawma’n a khar.

Khuallian chuan Ram leh Hnam changkangin Thalaite leh mi nawlpui hlimna ngaipawimawhin intihhlimna an uar thu sawiin, chu chu rilru leh tisa lamah hnam hriselna a tan a pawimawh thu a sawi bawk a ni. Tourism Department in Sawrkar Laipui Sum hailuta Thalfavang Kut an huaihawt thei chu lawmawm a tih thu a tarlang a. Kut chu mi tin huap intihhlimna, Talent chi hrang hrang pho chhuahna leh Talent hai lanna mai bakah ram chhung leh pawn atanga Khualzin mite kaltlanga ei leh bar zawn kawnga ram tan hlawkna a nih thu a sawi bawk a ni.

Pu R.Lalrinawma chuan Pathian in hlim min phalsak angin hlim taka hringnun hman tur a nih lai in Pathian in mihring te chungah Ro a la rel dawn avangin Pathian tih tak chunga nun hmang turin kalkhawm mipuite chu a chah a. A tan ni atanga a tawp ni thlenga mipuite tawiawmna leh chanvo nei zawng zawngte inpekna, Tourism Department leh a changtu Minister Pu John Rotluangliana hmalakna te chu fakawm a tih thu sawiin Thalfavang Kut-2016 chu a khar a ni. 

Kharna inkhawmah hian Pu V. Lalremthanga, IAS, Secretary Tourism Department chuan inlawmna leh lawmthu sawina hun hmangin District Council 3 atanga Cultural Troupe te leh an Chief Executive Member (CEM) te inpekna chu fakawm a tih thu a tarlang a. Hei bakah hian Mizo Cultural Organisation (MCO), Chanvo nei zawng zawng te, Stall rawn hawng te, Association leh Sawrkar Department hrang hrang te,  Thalfavang Kut-2016 Organising Committee leh Kut hluta telpui tu mipui te chungah lawmthu a sawi a ni. Kut khar ni ah hian hnam lam, mal zai, Live Band, Bike Stunt Show, Power Glider leh intihhlimna chi hrang hrang buatsaih a ni a, hlut a hlawh in Mipui thahnem tak an fuankhawm a ni.