Vawiin chawhma dar 11:00AM khan DRDA Conference Hall-ah Siaha Officers' Club(SOC) ten  Siaha khawpui chhunga chhungkaw harsa zual  10 te leh District Jail, Hospital-2, Orphanage Home-2  aiawha lo kal te hnenah Krismas thilpek  tangkafai Rs.4000/- theuh an hlan. He Krismas thilpek hlanna inkhawm tawi hi Pu VL.Hruaizela Khiangte, President SOC ,in a kaihruaia, Pu Lalsiamliana, Ex.Member in Devotion hmangin, Pu Francis L.Ralte, Secretary  SOC in , krismas thilpek atan a sum tuak dan leh sem chhuah dan turte report pein,  SOC Patron 2 te Pi Harleen Kaur, IAS District Bawrhsap leh Pu V.Zacho, Executive Secretary, MADC, ten  Krismas thilpek tangkafai  hi a dawngtu turte hnenah an hlan nghal a ni.DRDA ConferenceHall-a hun hman zawh hian SOC hruaitute chuan Zero leh Kaochao'E' khaw lamah Krismas thilpek semchhuak turin an kal nghal a ni.

Siaha Officers' Club te hian Moonligth Award programme chhima Siaha khawpuia lo zin, Mizoram zaithiam Israel Lalbiakrema, DJ Lalvenhimi, Essy, Lawmi Khiangte te leh Siaha District-a zaithiam  te nen ni 10/12/2016 khan  Siaha khawpui hmun thumah Mobile concert neiin, mirethei te hnenah Krismas thilpek  atan vehbur an khawn a, Rs.41,934/-an hmu a ni. SOC member te thawhkhawm Rs.74,450/- nen, a vaiin Rs.1,16,384/-hi Krismas thilpek rawngbawl nan an hmang a ni. Siaha khawpui chhungah veng 2 : Meisavaih leh Siahatlah atangin chhungkaw harsa zual, an veng VC leh Tlawmngai pawl te thlanchhuah chhungkaw 5 ve ve te hnenah Rs.4000/- theuh pek an ni a. Siaha khaw pawn thingtlang khua 2: Zero leh Kaochao'E' atangin chhungkaw 11(Zero-5 leh Kaochao-6)  te hnenah Rs.4000/- theuh pek an ni bawk. Heng chhungkaw harsa zual 21 te bakah hian, District Hospital  leh ECM Nursing Home Poor Fund  atan Rs.4000/- ve ve pek an ni a.  ECM Orphanage Home leh Salvation Orphage Home te hnenah Rs.4000/- ve ve pek a ni bawk.  District Jail  leh  Saikao khua a awm CCIM Orphanage Home te hnenah Rs.2000/- ve ve pek a ni bawk.