Higher Secondary School Teachers’ Association of Mizoram (HISSLAM) Annual General Conference vawi 18-na chu vawiin khan Health and Family Welfare, Information and Public Relations, etc. Minister Pu Lal Thanzara chuan a hmanpui. He conference, Aijal Club-a neihah hian khuallian chuan HISSLAM Directory tlangzarh nghal in, an member zinga National leh State Award dawngtute hnenah lawmpuina thilpek a hlan bawk.

Minister Pu Lal Thanzara chuan HSSLC zirtirtute thawhrimna zarah kumin HSSLC result tha zawk kan han nei hi a ropui hle a ni, tiin kalkhawmte chungah lawmthu a sawi a. Higer Secondary zirna tichangtlung turin Sorkar hmalakna thar NEDP hnuaiah classroom siam belh nan cheng 2.80 vbc dah a nih thu leh, lecturer 100 chuang dah ngheh an nih tawh thu te, Principal Recruitment Rules pawh siam tha tura hmalak a nih thu te la sawi a. Minister chuan Pawl 11 leh 12 hi zirlaite nunah a pawimawh ber lai, subject lak fuh leh fuh loh, an zirlaia an tui leh tuiloh azira an college nun pawh nasa taka a innghah hunlai anih avangin Higher Secondary School lecturer-te chuan zirlaite damchhung nun kaihruaitu an nihna mawhphurhna chu hre reng tur a chah a. Zirtirtute’n school-a an sawi chu in lamah lo tihdanglam a har thu tarlangin, an zirtir dan leh isap tawng lam dan te pawh uluk a tura a chah a; zirtirtu hna chu school compound-ah a tawp mai loh avangin leh zirlaite entawn reng an nih avangin zirtirtute chu school pawna an nun leh awm dan ah fimkhur a, zuk leh hmuamah pawh insum tura a beisei thu Minister hian a sawi a ni.

Health Minister chuan HSSLC zirtirtute chu naupang kum 16-18 enkawl tute an nih angin heng, tunlaia kan rama hluar ta em em HIV/AIDS leh zuk leh hmuam dona kawngah thahnem ngai taka ram tan naupangte hnena zirtirna petu ni tura a duh thu a sawi a. Tunhnaia Mizorama HIV/AIDS kai thar tam ber te chu ruihhlo ngai te aiin mipat hmeichhiatna avanga inkaichhawn anih tawh thu tarlangin, Sex education kalpui theih anih chuan HIV/AIDS leh kumtlinglo naupai leh nau tihtlak awm thin chu nasa taka pumpelh theih a beiseiawm thu a sawi a. Hemi kawngah hian Health & Family Welfare Department chuan school hrang hranga inhrilhriatna neia hma a lak tum thu a tarlang bawk a. Zirtirtu hna chu rawngbawlna ropui tak, pawimawh em em, Missionary hna nen a tehkhin theih hial a nih thu sawiin, khuallian chuan conference palai kalkhawmte chuan an zirlaite chu kawng tinreng a chhawr tlak, lehkhathiam leh nungchang mawi, mi puitling tak chher chhuak turin a chah bawk.

HISSLAM Conference hi an Vice President Pu C. Laldinliana’n kaihruaiin, Pu Vanlalzuata, President hnen atangin thusawi ngaihthlak a ni bawk a. Pu V. Vungliana, General Secretary chuan kum 2015-2016 chhunga an association hmalakna report a pe a. HISSLAM Conference, 2015 in siam tura a lo rel tawh bawhzuinaa Directory siam chu khuallian chuan tlangzarh in, an member pahnih – National Award to Teachers, 2015 dawngtu Pu H. Ngurthansanga, (Mizo), Govt. Mamawii HSS hnenah leh State Awards for Teacher, 2015 dawngtu Pu Lalthantluanga Tochhawng, (English), Govt. GM HSS te hnenah lawmpuina thuziak a hlan bawk a. Hun hi Pu Lalthanzuala, Asst. General Secretary chuan lawmthu sawiin a khar a. Chawhnu lamah thurel in a chhunzawm a ni.

HISSLAM hian kum 2015-2016 chhung khan hmalakna hrang hrang neiin, December, 2015 khan State Level Inter Higher Secondary School Quiz Competition buatsaihin, kum 2016-2017 Academic Calendar zulzuiin Calendar te a siam bakah Zone-Wise HSSLC Games & Sports inelna nei tura hma lak mek a ni a. Vawiin conference-ah hian School Academic Calendar ennawn chungchang te, HSSLC Exam-a tittha bik te tan lawmman siam leh, RMSA leh a kaihhnaih chungchang dangte rel a ni.